676/2026-2027

Kolasib, 22nd May, 2026: Vawiin khan Pi B Malsawmtluangi Additional Deputy Commissioner (ADC) hovin District Skill Development Plan meeting neih a ni a. He hunah hian Kolasib District chhunga thalaite tana thiam thil (skill) mamawh hrang hrangte sawi ho a ni.

Thutkhawm kaihruaitu Kolasib ADC chuan, thalaite hna neilova an awm mai mai loh nan leh mahni intodelha hma an sawn theih nan eizawnna atana hman tlak thiam thil (skill) an neih a pawimawh zia a sawi a. "Kan thalaite hian lehkha thiamna ringawt piah lamah, kutchhuak leh thiamna tak tak (skill) an mamawh tawh takzet a ni. Chuvangin, Kolasib District chhungah hian khawi lam nge eizawnna tling thei leh kan mamawh ber (skill demand) tih kan zawnchhuah a, chumi mila ruahmanna siam chu kan tih tur pawimawh tak a ni," a ti.

ADC chuan he hmalakna hi a tak ram a chan theih nan leh sawrkarah ruahmanna dik leh rintlak thehluh a nih theih nan 'Demand Collection Form' awmze nei leh uluk taka thehluh a tul thu a sawi bawk.

Vawiin thutkhawmah hian Kolasib District tana Skill Demand awm theite sawiho a ni a. District tana Demand Collection form siam te chu sawi ho niin, fill-up nghal a ni. Hemi bakah hian Kolasib District Skill Development Plan siam dan tur leh a tak ram chantir dan turte uluk taka rel ho a ni bawk.