677/2026-2027

Dated Serchhip, 22^nd May 2026: Vawiin khan 'Accessible India Campaign' hnuaiah Pi Vanlaldiki Sailo, Commissioner, Persons with Disabilities (PwD) kaihhruai Access Audit Team-te’n Serchhip khawpui huamchhunga sawrkar hmunhma hrang hrangahte, rualbanlote (vohbikte) tana awlsam zawka luh chhuah theihna (Access Audit) an siam dante endikna an nei a. DC Office, District Hospital, Govt. Serchhip College, Shalom Special School leh Govt. Serchhip Higher Secondary School-te endik a ni.

Mizoramah Office of the Commissioner, Persons with Disabilities hmalaknain ni 21 February, 2025 atang khan 'Access Audit' hi neih tan a ni a. Vawiin May ni 22, 2026 hian Serchhip District hmun pawimawh tak takte hi enfiah niin, Commissioner Pi Vanlaldiki Sailo chuan Serchhip-a hmun pawimawhahte vohbikte tan hmunhma nuam tak siam a ni chu lawmawm a tih thu a sawi a, abikin Serchhip District Hospital leh Govt. Serchhip College te chu vohbikte tana hmunhma buatsaih kawngah an fakawm a tih thu a sawi a. Serchhip District Hospital chu District Hospital dangte tan pawh entawntlak a tih thu  a sawi bawk. 

Commissioner Pi Vanlaldiki Sailo chuan ram changkang apiangah vohbikte an ngaihsak zual thu sawiin "Pianphunga rualbanlote’n pangngai taka nun an hman ve theih nan, a tulna apiangah kan tanpui an ngai hle a ni," a ti a. Sawrkar laipui duh dan angin, sawrkar pisaah te, zirna inah te, Biak In leh vantlang mipui punkhawmna hmunahte rualbanlote (vohbikte) tan hmunhma nuam (accessible environment) kan buatsaih zel a tul hle a ni, a ti a; wheelchair hman ngaihna hmun te, mitdelte tana braille tarna hmun siam dan te, mipui punkhawmna vantlang building hrang hranga an kalvelna tur hmunhma buatsaih dan tur ruahmanna (drawing) te a sem nghal bawk.  

Vawiina Access Audit neihna-ah hian Pi Lalchhanhimi, SDC; Pi Caryll Lalpari, CDPO; Pu K. Lalhmingchhuana, JE PWD Building Division; Pu Benjamin Zirthansanga, DSWO representative; Pu Lalhlimpuia, Special Educator, Samagra; Pi R. Laldampuii, Special Educator Samagra; Pu C. Lalrindika, I&PR aiawhte’n Audit Team-te hi an tawiawm a ni.

India ram pumpuiah Access Audit hi chak taka kalpui mek niin Mizoramah pawh district 9-ah he programme hi kalpui tawh niin, Mizoram pumpuiah endikna hi neih chhuah vek tum a ni.