28th Road Safety Week chu tukin khan Diakkawn, Kolasib-ah Pu C.Lalzahngoa, Suprintendent of Police Kolasib in  a hawng. He hapta hi “Fimkhur la Nun chhanchhuak rawh” tih thupui hmangin vawin 6th February, 2017 atangin 12th February, 2017 thleng hman a ni ang.

Hawnna inkhawmah Pu C.Lalzahngoa chuan thusawiin, khawvel pumpuiah India-ah lirthei 1% chauh a awm chungin lirthei chetsualna chu 6% lai a ni a ti a. Nikum chhung khan Kolasib District ah lirthei chetsualna liantham vawi 12 thlengin, mi 10 in nunna an chan thu a sawi a. Heng lirthei chetsualna tam zawk hi a lirthei khaltu fimkhur tawk loh vang anih thu sawiin, fimkhur kan zir thar leh a pawimawh a ni a ti a. Kolasib kawng phei chu highway anih avangin kawng a tha a, fimkhur lehzual a ngai a ni a ti a. Public service lirthei viz.Taxi, Auto Rickshow, Maxi-cab, bus etc. te motor khalh laia meizial zuk leh mobile phone hman te dan kalh anih avangin ti lo tur a chahin, uluk lehzuala check thin anih tur thu a sawi a. Road Safety Week hian kan rilruah ‘Fimkhurna’ tih se a duh thu a sawi a ni.

28th Road safety Week hawnna inkhawm hi Pu R. Lalnunmawia, District Transport Officer, Kolasib in a kaihhruaia a, Pu H.F. Sena Prominent Citizen-in thusawina a nei bawk a ni. He hapta chhung hian mobile checking neih a ni anga. 9th February, 2017 chhunah Kolasib Town Area chhunga Taxi leh Autorickshow khalhtu te tan COTPA, Traffic Rules, AIDS chungchang leh awmdan mawi inzirtirna neih a ni anga, zanah Maxi-cab khalhtu te tan neih a ni bawk ang a. Taxi, Auto Rickshow leh Maxicab driver tha thlan chhuah a ni anga, lawmman tha tak siamsak an ni dawn a ni.