2151/2023-2024

2023 Khuangchawi thla ni 4: 2nd Special Summary Revision, 2023 neih zawh tak aṭanga buatsaih, Mizoram Legislative Assembly Inthlanpui, 2023-a hman tur Kolasib District-a assembly bial pathuma final electoral roll chu vawiin khan Kolasib District Election Officer, Kolasib Bawrhsap ni bawk Pu John LT Sanga chuan DC Conference Hall-ah a tlangzarh a. Final electoral roll hi political party ai awhte hnenah a hlan nghal.

Kolasib DEO Pu John LT Sanga chuan a hun taka MLA Inthlanpuia hman tur final electoral roll tlangzarh theih a ni chu thawktute inpekna leh thawh rimna vang a nih thu sawiin, Election Branch, ERO leh AERO te chungah lawm thu a sawi a. Hemi atana thawhpuitu BLO, political party leh tlawmngai pawlte chungah lawm thu a sawi bawk. MLA Inthlanpui lo awm tur atan Kolasib District chu ngawrh takin a inbuatsaih mek tih sawiin, kum lama upa (kum 80 chung lam) leh pianphunga harsatna nei (person with disability)-te zinga polling station pan thei lote'n mahni in lum aṭanga postal ballot hmanga vote an thlak theih nan ruahmanna siam a ni dawn tih a sawi a. MLA Inthlanpui lo awm turah inthlan felfai, ṭha, thianghlim leh lang tlang a awm theih nan inthlan buaipuitute, political party-te, tlawmngai pawl leh mipuite inkarah thawh hona ṭha a awm ngei a beisei thu sawiin, Kolasib District-a vote nei zawng zawngte chu inthlannaah vote thlak tum ṭheuh turin a sawm nghal a ni.

Vawiina final electoral roll tlangzarhnaah hian District Level Standing Committee member (ERO, AERO, sawrkar official dang, political party, NGO, MJA, zirlai pawl leh MPF ai awh leh prominent citizen)-te an tel a. Election Officer Pi Christina Lalmuanzuali chuan final electoral roll dinhmun tlangpui tar langin, sawi hona hun hman a ni bawk.

Vawiina tlangzarh tak Kolasib District 2nd Special Summary Revision final electoral roll, 2023-ah hian 4-Tuirial (ST) Assembly Constituency (A/C)-ah vote nei mipa 8,991 leh hmeichhia 9,373, an vaiin mi 18,364 an awm a; draft roll aṭanga paih 362 leh thun thar 477 awmin, draft roll aia a punna hi 115 a ni. 5-Kolasib (ST) A/C bialah vote nei mipa 11,297 leh hmeichhia 12,674, an vaiin mi 23,971 an awm a; draft roll aṭanga paih 424 leh thun thar 682 awmin, draft roll aia a punna hi 258 a ni. 6-Serlui (ST) A/C bialah voter mipa 10,355 leh hmeichhia 10,812, an vaiin mi 21,117 an awm a; draft roll aṭanga paih 236 leh thun thar 666 awmin, draft roll aia a punna hi 430 a ni. Kolasib District-ah hian a pum puiah vote nei mipa 30,603 leh hmeichhia 32,859, an vaiin mi 63,462 an awm a; draft roll aṭangin voter 803-in an pung a, a punna hi 1.28% a ni.

Sex ratio anga chhutin 4-Tuirial bialah voter mipa 1,000 zelah hmeichhia 1,042 an awm a; 5-Kolasib bialah voter mipa 1,000 zelah hmeichhia 1,122 awmin, 6-Serlui bialah voter mipa 1,000 zelah hmeichhia 1,048 an awm thung a. Kolasib District pumah voter mipa 1,000 zelah hmeichhia 1,074 an awm a ni.

4-Tuirial biala polling station 26 awmah, voter 1,338 awmna 4/15-Kawnpui V P/S chu voter tamna ber niin, voter 100 awmna 4/25-Seṭhawn P/S chu voter tlemna ber a ni a. 5-Kolasib biala polling station 29 awmah, voter 1,279 awmna 5/19-Venglai-II P/S chu voter tamna ber niin, voter 329 awmna 5/5-S. Chhimluang P/S chu voter tlemna ber a ni a. 6-Serlui biala polling station 34 awmah, voter 1,074 awmna 6/30-Rengtekawn P/S chu voter tamna ber niin, voter 175 awmna 6/9-Saihapui 'V' P/S chu voter tlemna ber a ni thung a. Kolasib District pum huapin polling station 89 awmin, voter 1,338 awmna 4/15-Kawnpui V P/S chu voter tamna ber niin, voter 100 awmna 4/25-Seṭhawn P/S chu voter tlemna ber a ni thung.

Vawiinah hian service voter roll pawh tlangzarh nghal niin, 4-Tuirial aṭanga sipaia ṭang service voter 132 an awm a. 5-Kolasib-ah service voter 126 awmin, 6-Serlui-ah service voter 145 an awm bawk a. Kolasib District pum puiah service voter 403 an awm a ni.