2152/2023-2024

Champhai the 4th October, 2023 – Kan hma lawka Mizoram Assembly Elections, 2023 lo thleng tur atana inpuahchahna kal zelah vawiin khan Champhai DC & District Election Offier ni bawk, Pu James Lalrinchhana kaihhruaiin a office chamber ah hmalak zel dan tur relin meeting pawimawh neih a ni.

Meeting-ah hian Addl DC & Returning Officer 23 Champhai North AC Pu M. Misael; PD,DRDO & Returning Officer 25 East Tuipui AC Pu Lalrinawma; Champhai Election Officer Pu Benjamin Zalawm Ralte leh Nodal Officer thenkhat an tel a ni.

Champhai DC & DEO Pu James Lalrinchhana chuan official kalkhawmte chu inthlan hmachhawn tura mawhphurhna fawng chelhtute an nih angin an inpuahchahna felfai taka kalpui a, a tul apiang chak taka an bawhzui chhoh a tul thu a sawi a. An inkarah thawhhona tha tak a awm theihnan anmahni zawn theuha hmalaknate leh harsatna te pawh inpawh tlang taka inhrilh hre zung zung thin turin a chah bawk a ni.

Meeting-ah hian election-a duty tur sawrkar hnathawk in ruat tawh dan dinhmunte leh inthlan puan anih veleh a chet lak dan tur te sawiho a ni a. Inthlan kaihhnawih leh vuakveta sawrkar official ten an tih tur leh tih loh tur te anlo hriat chian zawk theihnan Champhai District Head of Office meeting cum training koh thuai ni se tih Committee chuan a rel a. Inthlan puan anih hnua Model Code of Conduct chungchanga mipuite hriattur pawimawh te thehdarh tur Awareness Material te pawh siam ni se tih meeting chuan a rel bawk a ni.

Election Complaint Room leh Control Room tur te bakah Media Centre awmna tur pawh ruat fel tawh niin a tul ang hmanrua te dah turin hmalakna a kal mek thu Election Officer Pu Benjamin Zalawma Ralte chuan a report bawk a ni.

Mizoram Police Radio Organization (MPRO) thawktute pawhin he hunah hian report pe in, election hmachhawn turin ruahmanna felfai tak an nei tawh a ni.