2153/2023-2024

Dated Serchhip, the 4th October, 2023: Vawiin khan Serchhip District Election Officer Pu David Lalthantluanga, IAS chuan 2nd Special Summary Revision of Photo Electoral Roll, 2023 neih zawh taka Serchhip District Final Electoral Roll chu Serchhip DC Meeting Hall-ah a tlangzarh.

Pu David Lalthantluanga chuan Final Electoral Roll tlangzarh a ni ta chu lawmawm a tih thu sawiin ERO, AERO, BLO, Election Branch a thawktu te bakah khawtlang hruaitute, political party leh tlawmngai pawl, he roll a puitlin theihna tura rim taka thawktu zawng zawng te hnenah lawmthu a sawi a. An thawhrimna avangin Electoral Roll felfai leh thianghlim tak kan neih theih phah a ni, a ti.

DC hian Final Roll a tlangzarh zawh hian Electoral Roll hi Political Party hrang hrang aiawh lo kalkhawm te hnenah a hlan nghal a ni.

Serchhip District chhunga Voters awm zawng zawng zat hi 54,152 an ni a. An zinga 27,887 hi hmeichhia niin a dang 26,265 te hi mipa an ni. Service Voters hi 413 an awm a, Service voters chhiar tela Serchhip District a voters awm zat chu 54,565 an ni. Draft Electoral Roll nena khaikhinin Final Roll a General Voters punna zat hi 339 a ni a. Serchhip District chhunga vote tamna ber 26-Serchhip AC ah voters 20,609 awmin an zinga 9678 hi mipa an ni a, hmeichhe voters zat hi 10,931 a ni. 27-Tuikum AC-a voters awm zawng zawng zat chu 16,903 an ni a, an zinga 8527 hi hmeichhia niin mipa 8376 an awm a, 28-Hrangturzo AC-ah voters 16,640 awmin an zinga 8429 te chu hmeichhia an ni a, mipa voters hi 8211 an awm thung. Assembly Constituency pathum ah te hian hmeichhe voters an tam zawk vek a, gender ratio hi 1062 a ni.

Serchhip District chhunga Assembly Constituency 3 ah Polling Station 88 a awm mek a; 22-Serchhip-XII Polling Station ah vote nei mi 977 awmin voter tamna ber Polling Station a ni a, 31- Vanchengte Polling Station-ah vote nei mi 95 awmin Polling Station voter tlemna ber a ni.

Electoral Roll thar tlangzarh a nih hnu hian kum 18 tling chin te tan chuan hming thun thar (Continuous Updation) hi kalpui chhunzawm a la ni dawn a. Candidate te inhnuhdawh theih ni hnuhnung ber- last date of withdrawal of nomination atanga chhiar leta ni 10 ral hmain roll hi peihfel vek tur a ni.

Final Roll tlangzarhnaah hian Addl DC Pu James Lalnithanga, ERO pahnih Pi Rebecca Laldinmawii Hrahsel leh Pu Gaston Vanlalhriatpuia; EO Pu Lalrinsanga Hnamte;  Political Party hrang hrang aiawhte, tlawmngai pawl aiawh te leh chanchinbumite an tel a ni.