Association for Voluntary Blood Donation, Kolasib leh Kolasib District Blood Bank țangkawp chuan vawiin (Ni 14.2.2018) hian, 'Valentines Day' denchhenin thisen pek runpui an huaihawt a; Kolasib thalai mi 61 in a thlawnin thisen an pe.

Valentines Day denchhena thisen pek runpui puala inkhawm tawi neih hi Blood Bank-ah neih niin, R. Lalramchhana, AVBD President kaihhruaina hnuaiah neih a ni a, he huna thusawitu Dr. HC Lalnunhlua, Physician, District Hospital chuan Kolasib damdawiin hian thla khatah thisen Unit 50-70 an mamawh thute, nitin Unit 2 chuang an mamawh thute a sawi. Sorkar in Blood Bank atanga thisen a pekchhuah 50% chuang mah chu a thlawnin pekchhuah anih thu a sawi bawk.

Chairman, AVBD President R. Lalramchhana chuan thisen pek chu Kristian kan nihna nen a in mil hle niin a sawi a, "Lal Isua khan min chhandam nan a thisen hlu tak a hmang a, keini pawh Lal Isua hnungzuitu kan nihna angin kan thisen hmangin midang nun kan chhan thei a ni" tiin a sawi.

Hmangaihna Ni-a thisen pek runpui-ah hian Mipa 29 leh Hmeichhia 32, an vaiin mi 61 in a thlawnin thisen an pe a. Kumin Valentines Day denchhena thisen pek runpui neihah hian thupui atan, 'Nunna chhan nan thisen pe rawh' tih hman a ni.