2531/2023-2024

2023 Khuangchawi thla ni 28: Election Commission of India (ECI)-in Mizoram Legislative Assembly Inthlanpui, 2023 lo awm tura vote thlak tura polling station pan thei lo (absentee voter) - upa kum 80 chung lam (senior citizen) leh vohbik (person with disability - PwD)-te tana postal ballot hmanga mahni in chhung luma vote thlak theih dan (home voting) a ruahman angin Kolasib District chhunga assembly bial pathumah vawiin aṭang khan absentee voter-te'n postal ballot hmangin vote an thlak ṭan.

In lama vote thlak tur absentee voter-te vote thlaktir turin Kolasib District chhunga assembly bial pathum, 4-Tuirial (ST), 5-Kolasib (ST) leh 6-Serlui (ST) bialah te mobile polling team pakhat ṭheuh siam a ni a. He'ng mobile polling team-te hi tukin khan Kolasib District Election Office kawt aṭangin an kal chhuak a, an chhuak tur hi Election Officer Pi Christina Lalmuanzuali, Nodal Officer for Postal Ballot Pi F. Lalnisai leh election official dangte'n an vai liam a ni.

Tuirial bialah polling station 11 aṭangin absentee voter 38 (senior citizen 28 leh PwD 10), Kolasib bialah polling station 18 aṭangin absentee voter 54 (senior citizen 50 leh PwD 4) leh Serlui bialah polling station 16 aṭangin absentee voter 50 (senior citizen 45 leh PwD 5) an awm a. Kolasib District pumah polling station 45 aṭangin absentee voter 142 (senior citizen 123 leh PwD 19) an awm a ni.

Mobile polling team-te hi bialtu Sector Officer-te'n hovin, an kalna polling station bialtu Booth Level Officer-te'n an lo ṭawiawm bawk a. Absentee voter-te hi an inah kal chilhin vote an thlaktir a ni.

Vawiin lama vote thlak hman lote chu kar leh Thawhṭanni, October ni 30, 2023 khian vote thlaktir turin mobile polling team-te hian an inah an kal chilh leh hlawm dawn a ni.