2702/2024-2025

Kolasib Dated: the 25th October, 2024:  Vawiin chawhnu khan DC Conference Hall Kolasib ah Pu Robert C. Lalhmangaiha DC Kolasib hovin Bairabi leh Sairang inkar Rel kawng siam mek hmalakna chungchangah District Official te, Indian Railway hotute leh  Rel kawngin a paltlang VC te nen an sawiho.

He hunah hian Rel kawng siamna atana mimal ram lak chungchang sawiin, chinfel  ngai la awm te chu chin fel a nih theih nan chak taka hma lak nise an ti.  Hei bakah hian Relkawngin a paltlang tur atana ram lak chin pawn lam a hmalakna hrang hrang awm nia sawi chungchangah Hortoki, Mualkhang leh Khamrang area ah mi 13 in complain an thehluh chungchang sawiho niin, hei bakah hian Rel kawng contractor te hnathawhna avanga mimalin harsatna an tawh hrang hrang Rel kawngin a pal tlang khaw hrang hranga VC ten report pe in sawiho a ni bawk. Rel kawngin a paltlang ram neituten zangnadawmna an la dawn kimloh chungchang te, Bairabi atanga Sairang inkara Rel in a hman tur electric ban phunna mimal ram compensate la dawng lo te leh railway company-in an la chhinchhiah loh hmun thenkhat a awm thu sawiho a ni a. Hun remchang hmasaberah District Collector te, Indian railway hotute, rel kawngin a paltlang VC te leh ram neitute nen joint verification nei tura ruahmanna siam a ni bawk. 

He hunah hian Railway hotu te chuan kumthar March ni 25 ah Mualkhang thlenga Rel luh tir theih an in beisei tih sawiin, hei bakah hian Jamira, Hailakandi district, Assam a Relkawng chhia avanga Mizoram a Rel lo lut thei lo chu Relkawng siam that a nih tawh thu leh, bungraw phur Rel pawh a kal tawh thu sawiin, passenger Rel erawh a la kal hrih lo tih an sawi bawk.