2212/2026-2027

Kolasib, 15th September, 2026: Vawiin  khan I&PR Conference Hall, Kolasib-ah Mizoram Sorkar hmalakna lian, Bana Kaih Scheme (Handholding Scheme) hnuaia Chief Minister's Special Package Grant Phase-II semna leh hrilhfiahna hun (Orientation Training) hman a ni. He hunah hian Kolasib District chhunga Progress Partner (PP) thlanchhuah mi 176 te hnenah tanpuina hi sem a ni.

He hunah hian Khuallian, Deputy Speaker Pu Lalfamkima chuan thu sawiin, "ZPM Sorkar inrel bawl tirh kum khatnaah sum renchemna (austerity measure) khauh taka kalpui a ni a, ba neuh neuhte rulh a ngaih avangin hmasawnna hna lian tham a kalpui theih rih loh a. Amaherawhchu, tunah chuan Sorkar hian kum hnih pawh la tling lo chhungin hma a sawn chho chak hle tawh a ni," a ti. Sorkarin kuthnathawktute a ngai pawimawh em em tih sawiin, Progress Partner thlan chhuahte chu an sum dawn chu a nihna tur ang taka hmang turin a ngen a, sorkar pawhin chhawmdawl zel tlaka a ngaih khawpa tan la theuh turin a fuih a ni.

Sorkar hmalakna dangte sawi langin Kolasib rama tha ve thei tur thlai- hmunphiah, anchiri leh thlai dang tam tak chin theih dan sorkarin a ngaihtuah mek thu sawiin,  "Sorkar a rinawm angin mipuite leh kuthnathawktute pawh kan rinawm a, taima taka hna kan thawh zui zel a pawimawh a ni," tiin kalkhawmte a chah a ni.

Khualzahawm, Kolasib Bawrhsap Pu H. Dolianbuaia pawhin thu sawiin, "Sorkar atangin tanpuina sum dawng lo pawh ni ila, mahni intodelh turin hna kan thawh hrim hrim a ngai a, chutianga mahni intodelh tumte tanpuina, Bana Kaih scheme-in a tum chu hlawhtlingpui theih loh thiang a ni lo," a ti. Thingtlang mi, lo nei thin a nih thu sawiin Bawrhsap chuan, "Mizo te hian taihmak kan mamawh a. Kan sum neihte hi hmang zo zel lovin, kan mamawh pawh kan tih tlem a ngai a, rinawmna hi a bulpui ber a ni," a ti. Kan ram chuan taima taka hna thawktute tan malsawmna tam tak a dawl tih a sawi bawk.

He CM Special Package Phase-II hnuaiah hian line department hrang hrang—Agriculture, Cooperation, Land Resources Soil & Water Conservation (LRS), Tourism leh Commerce & Industries kal tlangin Progress Partner te hnenah cheng 50,000 theuh sem chhuah a ni. Heng an sum dawngte hi vawk vulh, bean leh vaimim hmun siam, kuhva chin, ei chawp dawr, puanthui, mistiri leh eizawnna dangte atana hman tur a ni.

I&PR Conference Hall a hun hman zawh hian department tin ten anmahni hnuaia Progress Partner-te theuh hnenah a hranin training an neihpui nghal a, he hunah hian Certificate leh Placard te hlan nghal an ni.