1826/2023-2024

2023 Mimkut thla ni 11: Vawiin khan Kolasib District Bawrhsap Pu John LT Sanga hovin Kolasib DC Conference Hall-ah Kolasib Constituency huam chhunga Family Oriented Socio-Economic Development Programme (SEDP) Phase 2 hnuaia ṭanpuina dawng turte tana thil pawimawh inhrilhfiahna, "Beneficiary Assembly & Re-orientation" buatsaih tur chungchang sawi ho a ni.

Kolasib Bawrhsap Pu John LT Sanga chuan Kolasib District chhungah Family Oriented SEDP Phase 2 chu hlawhtling taka kalpui a nih theih nan line department-te chu theih tawp chhuah turin leh an department hnuaia beneficiary-te'n ṭha taka hma an lak theih nan uluk taka vil zui turin a chah a. Beneficiary-te'n hma an lakna turah SEDP thil tum tihlawhtling tura kawng kal neia hma an lak theih nan a theih anga tam zirtirna pek a ṭul thu sawiin, chumi avang chuan "beneficiary assembly & re-orientation" pawh chu buatsaih tura ruahman a nih thu a sawi.

He hunah hian line department hrang hrang ai awhte hnen aṭangin FOSEDP Phase 2 hnuaia beneficiary an neih dan leh an hma lakna report ngaihthlak a ni a. Kolasib District chhunga assembly constituency 3 zinga pakhat, Kolasib Constituency huam chhung bika beneficiary-te tana "Beneficiary Assembly & Re-orientation" chu Kolasib Diakkawn YMA Hall-ah September ni 13, 2023 chawhma dar 11:00-ah buatsaih ni se tih niin, Khuallian atan Bialtu MLA, Fisheries Minister Pu K. Lalrinliana beisei a ni.

Family Oriented SEDP Phase 2-ah hian Mizoram pumah beneficiary 60,000 awmin, benefiary tin hnenah ₹ 50,000/- ṭheuh pek tura ruahman a ni a. Kolasib District chhungah department hrang hrang pariat - Agriculture; Animal Husbandry & Veterinary; Commerce & Industries; Fisheries; Horticulture; Land Resources, Soil & Water Conservation; Sericulture leh Urban Development & Poverty Alleviation department-te hnuaiah beneficiary 4,438 awmin, Kolasib Constituency bikah beneficiary 1,474 an awm a. He'ng department hrang hrang hnuaia trade hrang hranga beneficiary-te hnenah hian SEDP ṭanpuina 1st instalment ₹ 25,000/- chu online-in an account-ah September 2023 chhung hian pek fel vek tura ruahman a ni.