Vawiin khan Kolasib-ah Nitin chanchinbu thar 'DUHLAI' tih chu Pi Lallianpuii, MIS, DIPRO Kolasib-in a tlangzarh.

Tlangzarhna inkhawm, Kolasib Govt. Middle School Complex  CRC Building a neihah hian tlangzarh pah a thu sawiin Pi Lallianpuii chuan, DUHLAI chanchinbu chu duhsakna hlanin mipui, ram leh sawrkar rawngbawltu rinawm ni turin leh an kalzelna-ah tlakchhiat hun a thlen pawha teirei peihna rilru pu turin a chah a. Journalist te tana siam Code of Ethics zawma, thu belhchian dawl leh thu bulfuk nei chhuah thin turin a ngen a ni.

Pu. K.Lalthlamuana, President, MJA in chanchinbu tlangzarh inkhawm hi a kaihruai a. Pu C.Thanmawia, Editor/ publisher, DUHLAI chuan thu sawiin a chanchinbu chu mipui rawngbawltu tur, a theih chin china unemployment problem tikiangtu tur a ni, a ti a. Pu C.Thanmawia hi accredited Journalist a niin, kum engemawzat chanchinbu danga lo thawk tawh thin a ni a. A ma pualin chanchinbu hi a din ta a ni.

He hunah hian Kolasib-a Department head thenkhat leh Ex-MLA Pu K.Lalrinliana bakah midang an tel thahnem hle a ni.