India ram rorelna sang ber Supreme Court-a Judge ni mek Hon'ble Mr. Justice  Altamas Kabir chuan zan hnih riakin Mizoram a rawn tlawh dawn a. Mi pawimawh lo zin tur chungchangah hian vawiin chawhma khan Chief Secretary Pu Vanhela Pachuau hovin Mizoram sorkar mi pawimawhte chu Secretariat Conference hall-ah an thukhawm.
Ruahman lawk ang chuan Hon'ble Mr. Justice Altamas Kabir, Judge, Supreme Court of India & Executive Chariman, National Legal Services Authority hian June ni 14, 2010-ah Aizawl a lo thleng ang a. A tuk June ni 15-ah Sihphir-ah 'Legal Aid Clinic & Awareness Programme' a hmanpui ang. Hemi ni tlai lam dar 4:00 ah Tourist Lodge, Chaltlang-ah Legal Awareness leh Inter-Departmental Conference a hmanpui leh ang a. He hunah hian Mizoram Chief Minister leh sorkar mi pawimawh dangten thu an sawi ve dawn a ni. Conference-ah hian Law & Judicial officers,  Social Welfare, Women & Child Development, Labour & Employment, Rural Development bakah a kaihhnawih department hrang hrang hotute tel tura beisei an ni. Mi pawimawh lo zin pual hian cultural programme buatsaih tum niin June ni 16 Aizawl a chhuahsan leh ang.