Vawiin khan Chapchar Kut 2014, chu Kolasib Tumpui Field-ah ropuitaka lawm a ni a. He Kut lawmnaah hian Kolasib Bawrhsap Pu Jitender Yadev chu ‘Kut Pa’ a ni.

Kut Pa Pu Jitender Yadev chuan hlim leh lawm taka Chapchar Kut hmang theuh turin kal khawm te duhsakna sang ber a hlan a. Mizo te hi hnam thil, culture & tradition-ah kan hausa em em a ni, a ti a. Hnam lam, hnam zai kan nei tha a, hengte hi thang leh thar zel ten kan hlut zel ka duh takzet a ni a ti. Mahni hnam zia leh ro hlu ngaisang thiam apiang hi, khawvela hnam challang leh ropui an ni tiin  Mizote pawn heng kan hnam ro thil, lam leh zai te hi i vawng nung zel ang u a ti.

"Khawvela ram ropui kan tih te hi, mahni hnam ro, hnam zia, zai leh lam chawisang thiam takte an ni zel a ti a, tourist hipna thatak a ni. Khual zinmi tena an hmuh leh hriat chak ber thin chu Culture leh tradition a ni fova. Mizote pawh hian kan culture leh tradition hi chhuang ila, hemi hmang ngei hian khawvelah ram kan la dawn a ni. India ramah hian hnam chitin kan cheng za a, a ram pum huap ang phei chuan, hnam ro nei hausa lutuk kan ni a, hei vang hian nitin ram hrang hrang atangin khual zin sing tamtak an lo lut reng a ni a", Kut Pa chuan a ti.

Thu a sawi zawh hian Kut Pa in ‘Hnathial’ hnah a fun ngei ‘Kut Sa’ a sem bawk.

Chapchar Kut  lawmna programme thawh khatna hi Pu H.T.Rila, Chairman Chapchar Kut Working Committee-in a kaihhruaia, Pu. R. Lalzokima, Secretary in report pe in Sub-Hqrs YMA Zaipawl te an zai bawk a. Pu CT Mawia, Sr. Vice Chairman, Chapchar Kut Working Committee in lawmthu sawina a nei bawk.

Programme thawh hnihna hi hman zui a ni a. Par lam MHIP Sub-Hqrs. ten an entir a. Solo, Hnam lam, Band, Siktuithiang lam, Mass Cheraw, Traditional Games, Chhawnghnawh leh Lemchan ‘Kungawrhi’ MCO Sub-Hqrs. ten an en tir a. He hun ah hian mipui tamtak an kal khawm a, an hlim tlang hle.