Mizote Kut ropui leh hriatlar ber ‘Chapchar Kut’ chu vawiin khan Lunglei Lunglawn Mual-ah hman a ni a, Lunglei DC Pu Lalhmachhuana chu ‘Kut Pa’ niin he hun hi a hmanpui a ni. Kut lawmnaah hian HPC Vice-Chairman Pu S.Laldingliana bakah tlawmngai pawl hrang hrang YMA, MHIP, MUP leh officials engemawzat an tel ve a ni.

Chapchar Kut 2014 lawmna hi Pu Johnny Zoramthanga, Organising Committee Co-Chairman-in a kaihruai a, Kut hawnna hunserh chu Rev.R.Lalbiakliana, Lunglawn Bial BCM-in a hmang a ni.

‘Kut Pa’ Lunglei DC Pu Lalhmachhuana chuan Kut chhim tura lo kal zawng zawngte lawmin Kut Chibai a buk a. Chapchar Kut chu pipute hunlai atanga Mizote Kut-te zinga ropui ber, huapzau ber leh hlimawm ber a nih thu sawiin kum khatah vawi khat chauh he hun hlimawm tak hi a herchhuak thin avangin Kut hmangtu zawng zawngte chu hlim taka hun hmang turin a duhsakna a hlan a ni. Mizoramah Kristianna lo luh hnuah Kut hman kan tim deuh a, amaherawhchu hun lo kal zelah, Mizote pawh kan Kristiannaah kan nghet chho zel a, kan ngaihtuahna leh khawsakziate pawh a changkang chho zel a, hnam nunphung leh ziarangte humhalh leh vawn nun a pawimawhna hrechhuakin Kut hman hi kan uar leh ta a ni, a ti.

Vawiin Chapchar Kut 2014 lawmnaah hian MCO Lunglei, YMA Branch hrang hrang, MHIP leh sikul naupang ten Mizo hnam lam leh zai chi hrang hrang - Cheraw, Sarlamkai, Par lam, Chai, Pawnto leh Hla do - an entir bakah 2nd MAP Pipe Band leh YMA Branch hrang hrang zaipawl nei a ni a; tunlai zaithiam lar tak tak engemawzat zaiin mipui an awi bawk a ni. Mizo zaithiam lar hmasa Pi Lalhunchhungi Pachuau, Pi Sailothangi Sailo leh Pi Zosangliani te pawh Lunglei Chapchar Kut-ah hian an rawn zai a, mipui lawm an hlawh hle a ni. Kum dang ang bawkin ‘Miss Chapchar Kut’ thlanna chu Lunglei MJA-te kutah dah a ni a; kumina ‘Miss Chapchar Kut 2014’ chu Nl.V.L.Ruatpuii, Salem Veng a ni.