Vawiin hi Chapchar Kut a ni a, Mizoram pumah phak tawk ang zelin ropui thei ang bera hman a ni. Hmanna pui ber Aizawlah chuan AR Lammualah chawhma dar 11ah hman tan a ni a, Kut Pa ah Pu Thanseia, Secretary, INTACH Mizoram Chapter a ni a, Kut Thlengtu chu Pi C.Zothankhumi, Secretary, Art & Culture department a ni.

Chapchar Kut hi Mizo Cultural Organisation, Gen Hqrs, Aizawl in Hlado chhamin an hawng a. Kut thlengtu Pi C. Zothankhumi’n thuhma sawi bawkin, CYMA President Pu Lalbiakzuala’n inlawmna thu a sawi bawk.

Kut Pa Pu Thanseia, a kum 85 na hmang mek chuan Chapchar Kut hi inremna hun leh induhsak tawnna hun a ni tiin, he inunauna ni kan hman hi Mizote Kut zinga Kut ropui ber leh vawiin thlenga kan chhawm nun awm chhun a ni a ti a. Chuvangin he chapchar kut ni atang hi chuan mi zawng zawng inlungruala, inhmangaih tawn theuh turin duhsakna a hlan a ni.

Kum danga hman tawh thin angin, vawiin Chapchar Kutah pawh hian lam, zai leh Mizoziarang pholang thei ennawm hmuhnawm tak tak entir a ni a. CYMA atangin Cheraw kanpui, Mizo khawsakphung chi hrang hrang, Mizawn inchuh leh solakia lam te an entir a, MUP Gen Hqrs in Mizo Pipu zai te, MZI in zaipawl zai leh MHIP in Parlam te an entir bawk a ni. Hengte leh malzai bakah Institute of Music and Fine Art (IMFA) in Pawhlohtlawh leh hmasang atanga pipute inchei dan an entir a, PC Girls School in Pawnto hla leh mi zawng zawng tel theihna Chai te a hman a ni.

Chapchar Kut pual hian ni 4 atanga vawiin thleng awh, Art & Craft Fair leh Food Festival, Lammual sirah buatsaih a ni bawk a, Painting & Photo exhibition, Vanapa Hall-ah leh Bamboo Product Exhibition, Assembly Annexe hnuaiah buatsaih a ni bawk a ni.

Attachment

  • Loading attachment...