Vawiin khan kolasib Tumpui khelmualah hlim takin Chapchar kut lawmna hun hman a ni.

Kut thlengtu Pu Zoengsanga District Bawrhsap chuan Mizo te tana ni hlu taka kalkhawm mipuite chu lo lawmin, Bialtu MLA in hun a rawn hmanpui thei chu thil lawmawm tak anih thu a tarlang a, he ni pawimawh tak hi mizo ten zonun zemawi lan chhuah tir nan hmangin hlim leh lawm taka hmang turin duhsakna a hlan a ni.

Kut Pa, Pu K Lalrinliana, FCS&CA, Fisheries etc Minister leh Kolasib Bialtu MLA ni bawk chuan kut hmang tura kalkhawm zawng zawngte chibai bukin hlim taka hun hmang turin duhsakna a hlan a. Chapchar kut chu mizote kut hman thin pathum zinga pakhat hlim taka an hman thin niin hun kal zel ah kristianna nena inmil tura her rem in kan hmang chho zel a, mizo incheina pho lan nan te kan hmang a, mizo nun zemawi tlawmngaihna, aia upa zahna, rinawmna leh midang tana nun/hun hman te chu heng mizo incheina ah hian zep tel in kan nitin nun ah pholang thin turin kalkhawm mipuite a chah a, he ni hi zofate inpumkhat nana bul tanna hun a tan hmang turin duhsakna a hlan bawk.

Ku Pa chuan chapchar kut chu kan Pi leh Pu ten kumtluan daihtur an thawhchhuah lawmnan awllen laiin an hmang thin a, chu chuan intodelhna nun an ngaih pawimawh zia a lantir ani tiin Mizo thalaite chuan intodelh na nun ngaisangin ngai pawimawh ila engkim hian hunbi a neih angin hun hmanthiam te pawh zir chho zel a pawimawh thu a tarlang bawk a ni.

Kut Pa chuan Kolasib ti hmingthatu mi pali te hnenah chawimawina thuziak a hlan a, Govt. Diakkawn High Sikul Headmaster, India Ram pumpuia zirtirtu chawimawina sang National Teachers Award dawngtu Pu GS Zaithantluanga; Indian National Hockey Player Nl. Lalremsiami Hmar; Mizote zinga Bridge Engineer hmasa ber leh Hmar Chhak biala Bridge Engineering a PhD hmu hmasa ber Dr R Lalthlamuana leh ICAR Scientist Pu PL Rinsanga te an ni.

Capchar Kut lawmna ah hian Mizo zai leh hnam lam chi hrang hrang pholan a ni a, intihlimna hrang hrang neih a nih bakah chawhnu lamah chapchar lunglen hun hman a ni.