Nimin February Ni 28 khan Ni 3 awh Tuipuiral Group YMA Conference Vawi 43-na Vangchhe Community Hall-a neih chu Bialtu MLA Pu Ramthanmawia'n khuallian niin a hmanpui.

Khuallian Pu Ramthanmawia chuan Tuipuiral Group YMA te chu a bial chhunga hmasawnna thlen tura  thawhpuiah a sawm a,  "Tuipuiral chu sik leh sa thuah pawh hmun nuam tak a nih thu sawiin, Zo zia hmuhnawm tak tak tamna, pi pu sulhnu hlui hlu tak tak awmna ram a nih avangin humhalha vawng nung zel angai ani" , a ti a. "Rethei harsa, chhawmdawl ngai leh tanpui ngai an puih chu Branch YMA tinungtu niin, mipuite'n an thlamuanpui thin a ni" a ti a. Pawl lian leh chak, Mizo mipuite innghahna YMA chu 'ram leh hnam humhalhna kawng hrang hrang -- thing leh mau, ramsa sava leh tuihna humhalhah te, ruihhlo leh sual do kawngah te rilru fim tak hmanga kawng tha dap chung zelin hma la se a duh thu a sawi a. Thuneitute hmang tangkai thiam tur leh tualchhunga chinfel theih chi pawh fel leh zahawm taka ching fel a, khawtlang that tlanna ber tur ngaihtuah chung zela hma la turin' a fuih a. Aia upa zah, tlawmngaihna leh hawihhawmna te par vultir zelin, rethei riangvaite ngai pawimawh thar zel turin a chah a. He hunah hian Khuallian chuan Ram tana a rawngbawlpui Home Minister tawiawmtute'n vanduaina an tawk chu pawi a tih thu leh an chhungte a tuarpui thu a sawi bawk a ni. 

Tuipuiral Group YMA Conference Palai Rorel hi nimin chawhma khan hman a ni a, nakumah Group YMA Conference Khankawn khuaah nghah a ni ang. Chawhnu lamah hnam lam chi hrang hrang entir a ni bawk. Nizan khan Pu Fabian Lalfakawma, Fin. Secy CYMA chuan kum puan "Ram leh Hnam Humhalh" a hawng a,  Central YMA atangin mi 3 leh Champhai Sub-Headquarters YMA atangin mi 3 an tel thei Conference pual hian Kawtchhuah Ropui leh sulhnu hlui dang fanna hun siam a ni bawk.

He hunah hian Kum 2019-2021 chhunga  Tuipuiral Group YMA hruaitu turte thlanna neih a ni a, 

President: Pu H.Lalniliana(Khawbung)

Vice President: Pu Lalkrosthanga(Chawngtui)

Secretary: Pu MC Lalramenga(Vaphai)

Asst. Secretary: Pu R.Lalremruata(Vanzau)

Treasurer: Pu B.Challianngura(Zawlsei)

Fin. Secretary:  Pu Rodingliana Sailo (Khankawn) te chu thlan tlin an ni.