Vawiin khan Kolasib District chhunga Department hrang hranga Officer te leh tlawmngai pawl thenkhat, Incident Response System-a mawhphurhna neite hnenah Chhiatna alo thlen thulha chet lak dan zirtirna pek a ni.

He zirtirna, Sensitization Programme on Incident Response System (IRS) hi Directorate of Disaster Management & Rehabilitation, Govt. of Mizoram leh District Disaster Management Authority, Kolasib ten an buatsaih a ni a. Govt. of India in kaihhruaina a siam dungzuia District chhunga chhiatna a thlena mawhphurtute dinhmun leh chet thawh dan tur mithiam ten an zirtir a ni.

Pu Lalhmunsanga Hnamte, MCS, Joint Director, Disaster Management & Rehabilitation Deptt. chuan Mizoram chu In kang, rial tla, leimin, Cyclone te thlen fona hmun a nih bakah kan In sak dan leh huan thlai neih dante a dikloh avangin chhiatna kan tawk fo a ni, a ti a. Hei bakah hian tui tla kan nei reng reng bawk a. Heng thilah te hian chet lak dan kan zir a, chhiatna hmachhawn dan kawngah tihdan fumfe (system tha) kan neih a tul a ni, a ti a. Nikum May thla a Laipuitlang leimin nasa takah khan tihdan thar leh ruahmanna thar hman a ni a, inzirna tur tam tak kanla nei a ni, a ti a ni.

Training petu dang Pu Zothansanga Hmar, District Organiser, DM&R chuan Kolasib District chhunga Incident Response System-a mawhphurtute chanvo leh chhiatna alo thlena hna thawh dan tur a zirtir bawk a. Zawhna engemaw zat zawh a niin hengte hi hrilhfiah a ni bawk a ni.

Pi K. Vanlalruati, SDO (Sadar) chuan thuhma sawiin DM & R mithiam ten hetiang training an rawn buatsaih sak chu vanneihthlak a tih thu a sawi a. Chhiatna chi hrang hrang kangmei, leimin leh thlipui te District chhungah alo thleng fova. Heng hmachhawn tur hian thiamna leh remhriatna nena tihdan felfai tak kan neih a ngai a ni, a ti.

Incident Response System ah hian chhiatna chi hrang hrang hmachhawn dan felfai taka duan a ni a. Mizoram pum huap State Disaster Management Authority chu Chief Minister chairman-na hnuaiah din a niin District tinah DC Chairman na-a District Disaster Management Authority chu din a ni bawk a ni.