Vawiin khan Transport Minister Pu John Rotluangliana chu a pisa-ah Transport Department officer-te nen meeting pawimawh tak an nei.

He meeting-ah hian Maxi cab Passenger Ticket Booking Agent License pekchhuah chungchang sawiho a ni a. License thi tawhte chu tihnun (renew) rih loh ni se, license thar dilna hun hawn mek niin a duh tan chuan dilna hi June 15, 2014 thleng thehluh theih a ni. Passenger Ticket Booking Agent License la thi lo zawng zawng pawh Department in tih tawp vek a tum nia mi thenkhatin an sawi chu thu belhchian dawl lo a ni a, license la nung te tihtawp tum a ni lo. Hei bakah hian meeting chuan taxi permit lem leh thi tawh hmanga service an awm ni a hriain endik tul a ti a, hun remchang hmasa berah taxi permit endik runpui neih an rawt a ni.

Transport Minister chuan Maxi cab a ni emaw taxi a ni emaw, man chawia mipui vahvelna public transport motor te hian anmahni duh thu in fare an ti sang ngawt thei lova, State Transport Authority (STA) ngaihtuah tur niin STA hi karleh tawp lamah thutkhawm an tum tih a sawi bawk.

Vawiin chawhnu vek khan Mizoram Maxi Cab Owners' Association hruaitute nen Transport Minister hi a pisa-ah an inkawm a. Minister hian harsatna leh lungawilohna an nei a nih chuan dawhkan kila sawipui zel tur leh sorkar hnena thlen hmasa lova nawrh huaihawt lo turin a ngen a. Association hruaitute pawhin lungrual taka sorkar zai ngaia kal zel an tum thu an sawi a ni.