2876/2023-2024

2023 Sahmulphah thla ni 29: Vawiin chawhma khan Kolasib District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Kolasib District Bawrhsap Pu John LT Sanga hovin Kolasib DC Conference Hall-ah an ṭhu khawm.

Chairman Pu John LT Sanga chuan member kal khawmte lawmna thu sawiin, bank ai awh kal khawmte chu Kolasib District hmasawn nana bank-te'n mawhphurhna lian tak an neih chu hria a, bank performance a lo ṭhat lehzual theih nan theih tawp chhuah turin a chah a. Mipuite'n bank kal tlanga dil theih scheme chi hrang hrang an hriat zau va, an hriat tam theih nan inzirtir tam a pawimawh thu sawiin, thingtlang khaw kilkhawr zawka awmte tan a tam thei ang ber awareness campaign nei ṭhin turin a fuih a. An hma lakna kawnga target an hmachhawpte ṭha taka tihlawhtling a, data dik leh rin tlak chauh theh lut ṭhin turin a chah bawk.

He ṭhut khawmah hian Lead Bank Office-a Lead District Manager (Kolasib & Mamit) Pi Lalengmawii leh NABARD hnuaia District Development Manager (Kolasib & Mamit) Pu JD Traite te bakah, Reserve Bank of India (RBI), Aizawl ai awh Pu Ashish Rai te, bank hrang hrang leh line department ai awhte an tel a ni.

He hunah hian meeting hmasa, September ni 18, 2023-a DCC meeting minute chu pawm a ni a. Kum 2023 July thla aṭanga September thla (2nd Quarter, 2023-24) chhunga Kolasib District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian financial inclusion plan hnuaiah Kolasib District chhunga mihring 2,000 aia tlem chenna khaw 29 te chu bank hrang hrangte'n chan insemin, bank kal tlanga hamṭhatna hrang hrang an chhawr ve theih nan hma lakna kalpui a nih thu tar lan a ni a. Pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), leh Atal Pension Yojana (APY), etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. July - September 2023 inkar chhungin bank hrang hrang kal tlangin mipui hnena sum hman leh enkawl dan inzirtirna (financial literacy campaign) ṭum 14 buatsaih a nih thu tar lan niin, line department-te nena ṭang ho leh NABARD aṭanga fund dil theih te pawh dilin, bank-te' n FLC tam zawk buatsaih turin hma la se, tih a ni.

He ṭhut khawmah hian Ghar Ghar KCC Abhiyan campaign chungchang pawh sawi ho niin, Kolasib District chhunga khaw hrang hrangah campaign neih a nih thu tar lan a ni bawk.

He hunah hian National Bank for Agriculture and Rural Development (NABARD), Mizoram Regional Office, Aizawl-in a buatsaih Kolasib District chhunga kum 2024 - 2025 chhunga agriculture kaihhnawih leh bank behchhana hma lak theihna tur ruahmanna, 'Potential Linked Credit Plan 2024 - 2025' chu Chairman/Kolasib Bawrhsap Pu John LT Sanga chuan a tlangzarh nghal a ni.