2877/2023-2024

Lawngtlai dated 29th November 2023: Vawiin chawhnu khan DC Conference Hall, Lawngtlaiah MLA inthlanna a vote tla chhiarna kalpui dan tur inhrilhhriatna hun neih a ni a. Pu Joseph H.Lalramsanga, District Election Officer chuan hun kaihruaiin Superintendent of Police, Returning Officer, Assistant Returning Officer, Election Officer, Political Party hrang hrang aiawhte leh official dangte an tel a ni.

Pu Joseph H.Lalramsanga, District Election Officer chuan boruak muanawm tak hnuai ah inthlanna felfai tak a kalpui a ni chu lawmawm a tih thu sawiin Lawngtlai district chhung a Sawrkar hnathawk, Political party hruaitute leh tlawmngai pawl hrang hrangte thawh hona that vang a nih thu a sawi. Vote chhiar dan tur tihchhinna, Dress Rehearsal pawh hlawhtling tak a kalpui a nih thu leh vote chhiarna kalpui hun ah Counting Observer pathum an awm tur thu a sawi a. Vawiin thleng hian Postal Ballot leh Service Vote 1572 dawn tawh a nih thu leh chungte chu 36-Tuichawng atangin 384, 37-Lawngtlai West atangin 453 leh 38-Lawngtlai East atangin 735 a nih thu DEO chuan a tarlang bawk a ni.

Thutkhawmna ah hian Pu Denny Lalchhuanawma, Election Officer chuan Powerpoint Presentation hmangin Vote chhiar ni a mawhphurhna hrang hrang insem dan te, Vote chhiarna hmun tur a dawhkan rem dan leh dawhkan a thu tur inruat dan te, Counting Hall a lut thei chin leh Media Centre buatsaih a nih dan te a tarlang a. Counting Official-te chu Counting Centre-ah zing dar 5 hma a an thlen a tul thu te, Postal Ballot chu dar 8 atang a chhiar tan a nih tur thu leh Postal Ballot chhiar tan a nih atanga darkar chanve ral hnu ah EVM a vote tla chhiar tan theih a nih thu a sawi bawk a ni. Thutkhawmna ah hian Election Official-te leh Political party aiawhte chuan December ni 1 hian Lawngtlai district Counting Centre, Govt. Lawngtlai College chu en ho tur a rel a ni.