2625/2023-2024

2023 Sahmulphah thla ni 3: Mizoram Legislative Assembly Inthlanpui, 2023 lo awm tur atana Kolasib District inpuahchahna kal mek chungchangah leh inthlanna felfai leh muanawm tak a awm theih nana thawh hona chungchangah Kolasib District Election Officer Pu John LT Sanga chuan vawiin khan a office chamber-ah Mizoram People's Forum (MPF), Kolasib District; Young Mizo Association (YMA), Kolasib Sub-Headquarters; Mizo Hmeichhe Insuihkhawm Pawl (MHIP), Kolasib Sub-Headquarters leh Mizoram Upa Pawl (MUP), Kolasib District Headquarters hruaitute a kawm.

Kolasib DEO Pu John LT Sanga chuan MLA Inthlanpui 2023 hmachhawn tura Kolasib District inbuatsaihna hrang hrang tar langin, tluang takin inbuatsaihna kalpui a ni tih a sawi a. Inthlan vuakvetah boruak ṭha leh muanawm tak a awm theih nan MPF te leh tlawmngai pawl hrang hrang aṭangin thawhpuina an dawng ṭha tih sawiin, an thawhpuinaah lawm thu a sawi a. Inthlan felfai, thianghlim leh muanawm tak a awm theih nan te, District chhunga vote neite'n zalen tak leh kim taka vote an thlak theih nan te theih tawpa thawhpui chhunzawm turin a ngen a. Official-te, MPF leh tlawmngai pawlte thawh hona aṭangin hlawhtling takin inthlan buatsaih fel theih a nih a beisei thu a sawi.

He hunah hian DEO hi 4-Tuirial (ST) Assembly Constituency Returning Officer Pi Melody Ngurthantluangi, 6-Serlui (ST) AC Returning Officer Pu Lalmuan Puia leh Kolasib DIPRO & MCMC Member Secretary Pu C. Lalhruaitluanga te'n an ṭawiawm a. Inkawm honaah hian MPF District Forum, Sub-Hqtrs YMA, Sub-Hqtrs MHIP leh Dist Hqtrs MUP hruaitu mi pahnih ṭheuh an tel a ni.

He hunah hian MLA Inthlanpui atana Kolasib District-a inbuatsaihna kalpui tawh chin thlir ho a ni a. November ni 7, 2023-a vote thlak huna boruak muanawm tak hnuaia inthlanna felfai tak a awm theih nana thawh hona tur hrang hrangte sawi ho a ni.