2626/2023-2024

2023 Sahmulphah thla ni 3: Vawiin tlai khan Kolasib District Election Officer Pu John LT Sanga, 5-Kolasib (ST) Assembly Constituency Returning Officer ni bawk chuan a office chamber-ah thu thar theh darhtute kawmin, Mizoram Legislative Assembly Inthlanpui, 2023 buatsaih tura Kolasib District chhunga inpuahchahna kalpui tawh chin leh hmabak la awmte a sawipui.

Kolasib DEO Pu John LT Sanga chuan MLA Inthlanpui 2023 buatsaih tur atana inpuahchahnaah tun kar chhungin hmasawnna tam tak a awm tih sawiin, inbuatsaihna hrang hrang chuan a vawrtawp a thleng chho mek tih a sawi a. Inthlan inbuatsaihna leh mipui hriat tur puanzar kawngah media-te an pawimawh tak zet tih sawiin, an thawhpuina ṭha tak avangin lawm thu a sawi a. Inthlan puan aṭangin chawlhkar tin media briefing hlawhtling tak neih a ni a, ṭum li lai media briefing neih a ni chu lawmawm a tih thu a sawi a. Kum danga la tih ngai loh kum 80 chung lam leh vohbik, polling station pan thei lote tan mahni in lama postal ballot-a vote thlak dilna hun hawn a nih angin, chuti ang dilna an dawn aṭangin mobile polling team-te'n an inah kal chilhin kum 80 chung lam 119 leh vohbik 19 chu vote thlaktir an ni tawh tih a sawi a. Kum 80 chung lam leh vohbik mahni in lama vote thlak ve lote tan chuan inthlan ni-ah mahni awmna polling station-ah vote thlak mai tur a nih thu sawiin, November ni 7, 2023 (Thawhlehni) zing dar 7 aṭanga tlai dar 4 inkara inthlan buatsaih turah Kolasib District chhunga vote nei zawng zawngte chu vote thlak vek turin a sawm nghal a ni.

He hunah hian DEO hi 4-Tuirial (ST) Assembly Constituency Returning Officer Pi Melody Ngurthantluangi, 6-Serlui (ST) AC Returning Officer Pu Lalmuan Puia leh Kolasib DIPRO & MCMC Member Secretary Pu C. Lalhruaitluanga te'n an ṭawiawm a. District MJA member eng emaw zat telin, zawhna leh chhanna leh sawi hona hun hman a ni bawk.

He huna tar lan a nih danin, October ni 28 leh ni 30, 2023-a home voting kalpuiah Kolasib District-ah senior citizen 119 (Tuirial - 27; Kolasib - 48; Serlui - 44) leh PwD 19 (Tuirial - 10; Kolasib - 4; Serlui - 5) te'n postal ballot vote an thlak a. Election duty turte aṭangin November ni 2, 2023 thlengin Kolasib District-ah postal ballot vote 599 (Tuirial - 213; Kolasib - 245; Serlui - 141) a tla tawh a. Election duty postal ballot vote thlak leh essential service-te tana postal ballot vote thlak hi vawiin lamah chhunzawm a ni bawk.

MLA Inthlanpui, 2023 lo awm turah hian Kolasib District-ah polling station 89 awmin, Tuirial bialah polling station 26, Kolasib bialah polling station 29 leh Serlui bialah polling station 34 a awm a. Model polling station, intlar ngaih lohna (queueless) polling station atan Kolasib Project Veng Polling Station chu ruahman niin, Chawngfianga Middle School, Saidan chu Unique Polling Station atan cheibawl mek a ni bawk a. Hmeichhe hlang duty-na tur, pink polling station 10 (Tuirial - 3; Kolasib - 4; Serlui - 3) ruahman niin, polling station 60% chu cctv hmangin web casting tih a ni dawn a ni.

November ni 5, 2023 (Pathianni) tlai dar 4-ah inthlan campaign theih hun tawpin, vote thlak zawh hun thlengin silence period puan a ni dawn a. November ni 6, 2023 (Thawhṭanni) zing dar 9 aṭangin polling party-te'n an duty-na tur hmun an pan ang a. November ni 7, 2023 (Thawhlehni) zing dar 7 leh tlai dar 4 inkar chhungin vote thlak a ni ang a. Ruahman dan chuan EVM/VVPAT leh inthlannaa hman form hrang hrangte chu vote thlak zawh veleh strong room awmna Government Kolasib College-ah luhpuiin, sipaite venin strong room-ah dah ṭhat a ni dawn a ni.