4092/2023-2024

2024 Vau thla ni 8: Vawiin hi 'Khawvel Pum Huap Hmeichhiate Ni' (International Women's Day) a ni a. Hemi pual hian District Hub for Empowerment of Women (DHEW), District Programme Officer (Women & Child Development) office huaihawtin St Joseph's Parish Hall, Kolasib-ah hun hman niin, Thingdawl RD Block-a Block Development Officer Pi F. Lalnisai chu Khuallian a ni.

Khuallian Pi F. Lalnisai chuan sawrkarin hmeichhiate ngai pawimawhin an hamṭhatna tur ruahmanna tam tak a siam bakah, dan hnuaiah an dikna chanvo a humhalhsak tlat tih sawiin, hmeichhiate'n mahni dikna leh chanvo hriat chian a pawimawh thu a sawi a. Rural Development Department-in nuho pawimawhna hriaa self help group (SHG) a din kal tlangin hmasawnna hna tam tak thawh a nih thu sawiin, RD hma laknaah chuan nuho chakna khua apiangah hmasawnna a kal chak tih a taka an tawn thu a sawi a. Zirna, hna thawhna leh ram rorelnaa Mizo hmeichhiate'n hma an sawn zel chu a lawmawm a, dinhmun sang leh pawimawh chelh zel thei tura theih tawp chhuah a pawimawh tiin, fate zirna kawngah nute ṭawngkamin awmze thui tak a neih theih avangin mahni fate thlawp leh fuih ṭhat a pawimawh, a ti a. Hmeichhe dinhmun chawi san nan hmeichhia leh hmeichhia inngaihsan thiam a, zahawmna inhum tawnsak a ngai tih sawiin, nuho kal khawmte chu ram hmasawnna ruhrel din kawnga an pawimawhna hria a, tel ve leh ti thei ve an nih inhre tur leh an theihna tipung zel turin a chah a ni.

He hun hi District Programme Officer Pi Lalthlengkimi chuan a kaihruai a. Kolasib Sub-Headquarters MHIP Vice President Pi Laltluangi'n hunserh a hmang a. DHEW-a Specialist in Financial Literacy Pi Zonunpuii'n Mission Shakti hnuaia hma lakna hrang hrang leh hmeichhiate dikna humhalhna dan te a tar lang a. Kal khawmte'n intluk tlanna khawvel siam tur leh inthliar hranna awm ṭhin veng tur te, hmeichhiate dikna leh chanvo humhalhsak tur tea intiamna thu tiam rualin, Allegro School of Music-a zirlaite - B. Lallawmawmi leh J. Vanlalruatengi te'n rimawi (violin) tumin kal khawmte an awi a. DHEW Kolasib-in Mission Shakti hma lakna chungchanga animation video an siam chu thlir ho niin, International Women's Day puala thu inziahsiak lawmman sem a ni bawk a. DHEW District Mission Coordinator Pi Elizabeth Lalmuankimi'n lawm thu sawiin hun a khar a ni.

Kolasib-a International Women's Day puala "Khawtlang leh nunphung siam ṭhat kawnga hmeichhiate chanvo" tih thupui hmanga thu tawi inziahsiak buatsaihah mi 22-in an thuziak an theh lut a. Pakhatna John Thlamuana Pautu (Kolasib Ṭumpui), pahnihna Kimtei Vanchhawng (Kolasib Ṭumpui) leh pathumna Lalrammawia (Kolasib Hmarveng) te niin, lawmman pawisa fai leh thuziak hlan an ni.

Vawiin International Women's Day hmannaah hian Kolasib khawpui chhunga MHIP member-te leh kohhran nuhote an kal khawm a ni.