Vawiin chawhnu dar 2:30 khan Brig. C. Vankunga Shopping Centre Conference Hall, Diakkawn-ah Kolasib DC Pu Jitender Yadav, IAS hovin Disaster Risk Reduction Day hman a ni a. He hunah hian thupui atan 'Mahni In leh Lo lama fimkhur dan tur leh chhiatrupna lo thleng thei laka inpuahchah dan' tih hmanga Dr. Lalrokima Chenkual paper buatsaih chu zirho a ni.

Kolasib DC chuan, "Chhiatna tam tak hi mihringte kan fimkhur tawk loh vanga lo thleng thin a ni a. Mizoram-ah chuan ram kang te, leimin te, electric kal sual avanga kangmei chhuak te hi kan chhiat tawh langsar te a ni a. Heng thil laka inven dan leh kan chunga a lo thlena hmalak dan tur inzirtir hi tih makmawh a ni" a ti. Kolasib DC chuan khawvel sik leh sa inthlak danglam leh khawvel lum deuh deuhte hian mi zawng zawng min nghawng avangin a tihnep dan kawngah mitinin mawh kan phur a ni a ti bawk.

Inkhawm kaihruaitu Addl. DC Pu Lalfela Sailo chuan chhiatrupna lo thleng thei zingah lirnghing hi hrilhlawk theih a ni lova, inralring renga awm hi mitin te tana sahimna bul ber a ni a ti. Inkhawm hi Pi K. Vanlalruati SDO (Sadar) in lawmthu sawiin a titawp a ni.