1770/2025-2026

Dated Kolasib the 7th October , 2025 : Vawiin khan Kolasib DC Conference Hall-ah Kolasib DC leh Indian Railways a thawktuten Rel kawng siam kaihhnawih a thil pawimawh hrang hrang sawihona neiin an thukhawm a. He hun hi Kolasib District Bawrhsap, Pu Robert C. Lalhmangaiha chuan a kaihruai a ni.

Thutkhawmna ah hian Bawrhsap chuan a thusawi hawnnaah, rel kawngin Sairang a rawn thleng ta chu lawmawm a tih thu a sawi a. Hei hi Mizoram tan rahbi pawimawh tak a ni a, India ram hmun dangte nen inkalpawhna a ti-awlsam hle dawn a ni tiin, inkalpawhna mai bakah Mizoram economic dinhmun pawhin hma a sawn phah ngei a beisei thu a sawi.

Thutkhawmnaah hian thu pawimawh tak tak rel ho niin, Rel kawng laihna a leivung thenfai loh te leh Rel kawng kama in sak bungrua hman bang, cement leh thir tuiek te chu hnawmhnawk a nih piahlamah leilung leh nungchate tan a hlauhawm theih avangin a rang thei ang bera tihfai a, sawrkarin bawlhhlawh paihna atana hmun a ruatah fel taka paih tur a Railway lam aiawhte hi sawipui an ni a. Hemi piahlamah ah hian chetsualna leh nunna chan an awm tawh lohna turin Rel kawng hnaiha awm leh chet vel a hlauhawmzia mipuia zirtirna pe turin Railways leh Village Council-te tangkawpin awareness program huaihawt se tih a ni bawk.

He hunah hian ram neitute hnena zangnadawmna la pek fel loh chungchang pawh sawilan a ni a. Bawrhsap chuan Railway hotute chu zangnadawmna la chinfel loh zawng zawngte a rang thei ang bera chingfel turin a ngen nghal a ni.

Vawiin hunah hian Kolasib DC bakah Pu David H Lalthangliana, Kolasib Sr SP te, Pi B Malsawmtluangi, Addl DC Kolasib te, SDO (Sadar) Kolasib te, SDO (C) Bairabi leh Kawnpui te leh Khamrang, Bairabi ,Mualkhang leh Hortoki a Village Council hruaitute an tel a ni.