Vawiin khan DC Conference Hall, Kolasib-ah District Development Coordination Committee (DISHA) Meeting chu an chairman Pu CL Ruala MP Lok Sabha leh Co-Chairman Pu Ronald Sapa Tlau, MP Rajya Sabha hoin Member te an thukhawm.

Chairman Pu CL Ruala chuan Kolasib District Development Coordination & Monitoring Committee te nen kum 10 chhung lungrual tak leh thawhhona tha tak an nei a Mizoram chu India rama DISHA kalpui tha ber pawl/ meeting  nei tha ber pathum zinga thlan tel a ni a, hei hi thil chhinchhiah tlak tak niin Committee Chairman a nihna angin memberte chungah lawmthu a sawi a ni. Sorkar hnathawkte chu mahni hna rinawm taka an thawh in mipuiten malsawmna rah an seng thin ani tiin inthlahdah hauh lo leh inlungrual taka thawk ho zel turin committee memberte a chah a ni.

Thutkhawmah hian Kolasib District huam chhunga Central Scheme kaltlanga hmalakna hrang hrangte thlir ho niin, PHED hmalakna National Rural Drinking water programme hnuaia khaw pariat zinga 4 ah hmalakna zawhfel tawh niin khaw dang 4 ah hnathawh mek ani a,  Swachh Bharat Mission hnuaia Individual Household Latrine 616 bakah School leh Angganwadi tan Latrine 49 sak a nih thu tarlan ani bawk. CMO tarlan dan in IMR chu 12.6% a ni a,  nu nau chunga thi pakhat a awm a, damdawi ina nau nei zat hi za zel a 95.13% niin kum 3 kalta atang khan Kolasib District ah Malaria avanga thi an awmloh thu a sawi bawk. Hetih lai hian thisen 1910 test zinga 113 chu HIV Positive an ni a nau pai (Raipuar) 1093 test zinga 12 chuan HIV an vei vawk a ni.

Pradhan Mantri Ujjwala Yojana hnuaia a thlawna Gas Connection pek tawh te chu Mizofed LPG in za zela 74%, Auva Gas Agency in 90%, Ramliana indane in 80% te an ni a. Mizoram State Rural Livelihoods mission hnuaiah Thingdawl RD Block ah Self Help Group 357 an awm a, Bilkhawthlir RD Block ah SHG 267 awm in heng ho zinga SHG ti thazual te hnenah a pung awm lova loan pek niin an ni hian Sumo Maxi Cab leh Pik-up te leiin chu chu sum thawhchhuah nan an hmang mek bawk a ni.

SSA Mission hnuaiah kum 2018-19 hian zirlai naupang 8523 te hnenah School Uniform grant pek an ni a, kum 2019-20 a tan zirlai naupang 7695 te hnenah pek leh tura ruahman a ni a, zirlai bu Braille textbook tel in Kum 2018-19 chhung khan a thlawnin zirlai naupang 8360 te hnenah pek chhuah niin kum 2019-20 chhung hian zirlai naupang 8935 te hnena pek chhuah leh tura ruahman a ni.

Vawiin thutkhawm-ah hian Pu Lalrinsanga Ralte, 6-Serlui A/C bialtu MLA, Pu Andrew H Thangliana, 4-Tuirial A/C bialtu MLA, Pu Zoengsanga District Bawrhsap bakah District Development Co-ordination & Monitoring Committee member te an tel a ni.