Chhiatrupna a thlen thulha buaipuitu leh inrin lawkna atana hmalatu leh ruahmanna lailawk duangtu District Disaster Management Authority (DDMA) chu vawiin khan DC Conference Hall-ah Kolasib DC Pu H. Lalengmawia kaihruaina hnuaiah meeting pawimawh tak neiin an thukhawm.

Meeting ah hian Kolasib District in chhiat rupna lo tawk ta sela, in puahchahna leh inbuatsaihna awm te a tha tawk em tia enfiah a Disaster Audit neia lokal, Disaster Management & Rehabilitation (DM&R) Director Pu C. Lalpeksanga leh a thawhpui te leh State Disaster Management Authority a Member, hetiang lamah thiamna nei Pu Dominic Lalhmangaiha te pawh meeting ah hian an tel a ni.

Meeting ah hian helama Department pawimawh bikte - Police, Health, PWD, PHE leh P&E chu hemi chungchangah inpuahchahna Disaster Plan leh an Department ten chhiatrupna a thlen thulha an thil neih leh midang te hawh leh hman tur atan Resource Mapping an ti em, tih te zawh a ni a. Health and Family Welfare Department (CMO) chuan an plan siam te tarlangin Department dangte chu hetiang Plan siam tur thu rawn pek a ni a. Department hrang hrangte Disaster Plan siam chu khaikhawmin District Disaster Plan chu siam tur a ni.

Kolasib DC Pu H. Lalengmawia chuan meeting chu a bengvarthlak leh a hlawkthlak hle nia thusawiin Department hrang hrangte hian a rang lamin Disaster Plan kan siam vek a tul a, Plan siam chu a tawk mai lova, chhiatrupna a thlen thulha kan mawhphurna leh chanvo te chu chiang taka kan hriat vek a ngai a ni, a ti a. Chhiatrupna a thlen thulha sawrkar chhawmdawlna a beitham thin a, chuvangin mahni in leh lo insurance nachang kan hriata helama kan thanharh a hun tawh a ni, a ti bawk.

DM& R Director Pu C. Lalpeksanga chuan Kolasib District hi Mizoram tan chuan hmun pawimawh a ni a, chhiatrupna entirnan lirnghing te lo thleng ta sela, District inpuahchah hian Mizoram pum a nghawng thei a, chuvangin helama District inhmakhuanate chu a pawimawh bik tiin Kolasib District Disaster Audit chu a hmasa bera nei a lokal anih thu a sawi a.

Chhiatrupna hi kan insawithaih a nilova, kan inrin lawk thei nan inpuahchah leh ruahmanna tha neih a tul zia inhrilh hre turin he thil hi kan vei a tul takzet a ni a ti. Chhiatrupna a thlen thulha an inpuahchahna turah CSS Scheme nei Department te chu an Budget atanga za zela sawm chu Disaster Fund atana hman theih tura dah turin ruahmanna siam a ni tawh a, hemi chungchanga sawrkar hriattirna chu chhuah vat beisei a nih thu DM & R Director hian a sawi bawk a. Vawiin khan Kolasib District Emergency Operation Centre dinhmun pawh Disaster Audit Team neia lokal mithiam te hian an hmuna kalin an enfiah a, a tul ang zela helai hmun hi thuamthat anih tur thu an sawi bawk.

Naktuk khian chhiatrupna a thlen thulha Incident Response System, Resource Mapping leh thil dang pawimawh te zirho turin DIPRO Conference Hall ah training neih a ni dawn bawk a ni.