Vawiin chawhnu dar 2:00 khan Kolasib DC Conference Hall-ah District Education Committee (DEC) Meeting neih a ni a , he meeting hi Pu Joseph Lalhlimpuia, Parliamentary Secretary i/c Education chuan a hmanpui a ni.

Pu Joseph Lalhlimpuia chuan, “District tina Education Committee-te hi kan bial chhunga zirna hmasawnna kawngah te, zirna chhiat leh that thuah te, SSA leh RMSA hnuaia hnathawh danah te mawhphurtu kan ni a, kan ngaihtuahna kan sen a ngai takmeuh a ni” a ti. SSA chu tunhmain mipuiten sum siamna awlsam anga an ngaih thin chu tunah chuan langtlang taka kal pui a ni a; kan sum hmanna te leh hman leh tura ruahman thlengin DEC member ten kan hriatpui vek a ni a ti bawk. Central sawrkarin Centrally Sponsored Scheme (CSS) 60 hnuaia sum a pek chhuah dan kalphung a thlak danglam avangin pawisa dawn mumal a la awm loh thu Pu Joseph Lalhlimpuia chuan a sawi a. “ Tunhmaa SSA leh RMSA project office-a direct-a sum an rawn pek thin kha State sawrkar account-ah an rawn dah tawh a, a kalkawng a kual thui ta hle ani”. a ti.

School Education Department hnuaia zirlai nuai 4 vel chu hriselna leh thianghlimna kawnga Mizoram hmahruaitu ni tura an inbuatsaih thu sawiin, “14th November hian Clean Movement bul kan tan dawn a, Chief Minister Pu Lal Thawnhawla'n he beihpui thlakna tur hi min hawnsak dawn a ni’ Pu Joseph Llahlimpuia chuan a ti bawk.

Vawiin DEC thukhawm hi Chairman leh Deputy Commissioner ni bawk Pu Jitender Yadav chaun a kaihruai a. Kum 2013-2014 chhunga SSA leh RMSA hnuaia hmalaknate thlirho a nih bakah, kum 2014-2015 chhunga SSA leh RMSA hnathawh mek leh hmachhawpte chipchiar takla sawiho a ni bawk.