Nimin chawhnu khan Mizoram State Law Commission chu an Chairman, Pu John Siamkunga, MLA hovin a Office Chamber-ah an thukhawm. Tun tum hi he Commission thutkhawm vawi 28-na a ni a, thu pawimawh tak tak an rel.

Law Commission meeting thurel pawimawh tak tak zingah hian Mizorama Dan hrang hrang hmanlai ennawn chungchang a tel a. Meeting chuan British hunlaia Dan siam, Mizorama la hman te hman ala tul zel em tih te, Independence hnua Central Sawrkar Dan siam, Mizorama hman theih leh theihloh te, Mizoram Sawrkar Dan siam ennawn a, siamthat ngai laite enchhuah ni se an ti a. Heng Dan hrang hrang lo list chhuak a, a tul anga hma lo la turin Member Secretary, Pu Zahmingthanga Ralte (Deputy Secretary Law & Judicial Department) leh Commission Member, Dr. Rualkhuma Colney, Mizoram Law College Principal ni bawk chu an ruat. An ni hian an hna an zawh veleh Commission chuan hmalak zui ni se an ti.