Vawiin khan Lawngtlai a Block Resource Centre ah Lawngtlai District chhunga Oil Palm chingtute intawhkhawmna hun buatsaih a ni a, he hunah hian Department of Agriculture (Crop Husbandry) Director Dr. C. Lalzarliana chu khuallian a ni.

Khuallian Dr. C. Lalzarliana chuan Oil Palm hi tuifinriat atanga teh a 800mtrs thlenga sangah a chin theih a, Lawngtlai District khawthlang lam ram tam tak hi Oil Palm chin nana hmantlak a ni a, hei vang hian loneituten theih tawp chhuah in ching se tih hi kan duh dan a ni a, chutihlaiin Oil Pal hi a tiak leh a rah phurh kual vel a hautak tham a vangin a hlawmin ching thei ila a nih loh pawhin kawngpui kamah ching thei ila duhthusam a ni, a ti. A hralhna tur hriatsa a nih avang leh a rah hi kum khatah vawi 14 vel zet a seng theih avangin Oil Palm chin hi innghahna tlak a tling tawh a Mizoram khawtlang lamah mi eng emawzat ten hlawk takin an seng tawh a ni. Amaherawhchu tanpuina leh therhlo beisei vanga chin tum kan lo awm a nih chuan ching lo law law turin ka ngen che u a ni, a ti bawk.

Tunah hian Lawngtlai District chhungah Oil Palm chingtu chhungkaw 1400 vel an awm mek a, ram 2500Ha velah chingin kung 96000 vel phun nun tawh niin Department lam chuan an tarlang.

Lawngtlai leh Lunglei District a Oil Palm tharchhuah te leisak turin Ruchi Soya Ltd. te chu MoU ziahpui an ni a, an ni hian Rotlang khuaah a hriak sawrna khawl bun tumin hma an la mek a ni. A hralhna Rate hi sawrkar lam leh company lam ten an bituk ho tur a ni a, an lawh atanga ni 15 chhungin a chingtu ten a man an dawng nghal zel tura tih a ni a, hemi hunchhunga an dawng hman lo a nih chuan an dawn har dan a zirin pung (interest) a nei zel dawn a ni.

Vawiin a Oil Palm chingtu intawhkhawmna hi Agriculture Department buatsaih niin Pu H. Joela Lawngtlai District Agriculture Officer in a kaihruai a, Pu R. K. Nithanga Deputy Director (Oil Palm) te, Pu C. Lalthlamuana Deputy Director (Soil Survey) te leh Pu Tlangtimawia Zote Technical Officer ten kalkhawm te hi Oil Palm chin dan leh a chinna hmun sawngbawl dan an zirtir a, Lawngtlai chhehvel khaw hrang hrang atangin Oil Palm chingtu mi 100 vel zet an kalkhawm a ni.