Vawiin chhun dar 12:00 khan MHIP, Tumpui Branch, Kolasib chuan an din champhaphak vawi 25-na Tumpui Hall-ah an lawm a, he hun hi Health Minister Pu Lal Thanzara chuan a hmanpui a ni.
Pu Lal Thanzara chuan, "Mizoram-a Chanchintha lo thleng hi a zarzo nasa bertu chu Mizo hmeichhiate hi in ni a, tunhma chuan in lamah leh ram lamah hmeichhiate phur a rit em em thin a, tunah chuan kawng engkimah mipate nen chanvo inang deuh rengin kan khawsa tlang tawh a, zirna leh eizawnna kawng tam takah phei chuan mipa te aiin hmeichhiate dinhmun a chungnung zawk tawh a ni" a ti. Mizo khawtlang nun siamthatna kawngah leh chhungkaw nun vawngtu atana hmeichhiate pawimawhzia sawiin Pu Lal Thanzara chuan, "Kristian chhungkaw dinna kawngah te, hriselna leh thianghlimna kawngah te, retheihna atanga chhungkaw khaichhuahna kawngah te hmeichhiate hian mipa te aiin thahnem in ngai thiam zawk a, chuvang chuan hetiang kawngah hian nasa lehzuala tan in lak a pawimawh a ni" a ti bawk. Ram siamthat duhtu tlawmngai pawl (NGO) hrang hrang Mizoram-ah an awm chu ram leh hnam tana vanneihna a nih thu Minister chuan a sawi a. "NGO hrang hrangte leh sawrkar inkarah thawhhona tha tak a awm thin avangin hmasawnna kawngah te, ram leh hnam tlukchhiat theihna sual do kawngah te kan sawtpui em em a, sawrkar sawiseltu nimai lova a thlawp thiam leh kut tichaktu nih hi mipuiten kan thiam a tul a ni" a ti. Hriselna enkawlna lamah Mizoram sawrkar chuan theihtawpa intihchangtlun a tum zel thu sawiin, doctor 37 leh nurse 25 lak mek an ni a, nurse hi kuminah 20 dang lak belh a, kumthara 25 dang lak leh tura ruahman mek a nih thu a sawi bawk. Miretheiten damdawia inenkawlna an dawn theihna tura RSBY hnuaia state tenau zinga India rama a ti tha ber an ni chu lawmawm a tih thu sawiin, "Hnathawktute inpekna avang liau liau a ni a, an chungah lawmthu ka sawi a ni" a ti bawk.
Health Minister Pu Lal Thanzara hian vawiin vek khan DIPRO, Kolasib office leh MJA Press Club sak mek te a tlawh bawk a ni. MHIP, Tumpui Branch silver jubilee hi ruai nen lawm a ni a, Gen. Headquarters leh Sub-Headquarters atangin an hruaituten an hmanpui a ni
