2779/2023-2024

2023 Sahmulphah thla ni 13: Vawiin khan Kolasib District Election Officer Pu John LT Sanga hovin DC Conference Hall-ah Kolasib District chhunga assembly constituency pathuma Returning Officer-te leh Assistant Returning Officer-te leh Election Officer te chuan Kolasib District-a inthlan buatsaih dan thlir letin, vote chhiarna tur atana ruahmanna hrang hrang an sawi ho nghal.

Kolasib DEO Pu John LT Sanga chuan MLA Inthlanpui 2023-ah Kolasib District-ah tluang taka vote thlak zawh fel a ni chu lawmawm a tih thu sawiin, inthlan hlawhtling tak buatsaih a nih theih chhan pakhat chu district election official-te, nodal officer-te leh mawhphurhna hrang hrang neitu official-te'n an hma zawna mawhphurhna tlate ṭha taka an hlen chhuah vang a ni, a ti a. Inthlan chu 80% vel zo tawh ang a ni tiin, hmabak la awm pawh official-te ṭhahnem ngaihna leh District mipuite thawhpuina azarah tluang taka hlen chhuah a nih a beisei thu a sawi.

He hunah hian Kolasib District chhunga inthlan buatsaih dan thlir let niin, hma lakna chhinchhiah tlak leh zawngchhangthlak deuhte tar lan a nih bakah, hmasawnna awm thei te sawi ho a ni a. Inthlan kaihhnawiha tih tur hmabak la awmte thlir ho a ni bawk a. Vote chhiarna hmun atana ruahman Government Kolasib College-a counting hall pathum buatsaih dan tur ruahmanna (drawing) awm sa chu thlir hovin, hma lak zui dan tur an sawi ho nghal bawk a ni.

Kolasib District chhunga assembly bial pathuma polling station 89-ah State chhung hmun dang rualin November ni 7, 2023 (Thawhlehni) khan tluang takin vote thlak a ni a. Vote thlak nana hman Electronic Voting Machine (EVM)/Voter Verifiable Paper Audit Trail (VVPAT) leh inthlanna lehkha pawimawhte chu Government Kolasib College-a strong room ruahmanah sipaite venin dah ṭhat nghal a ni a. Election Commission of India (ECI) aṭanga thu thar dang a awm a nih loh chuan, MLA Inthlanpui 2023-a Kolasib District chhunga vote tlate hi December ni 3, 2023 (Pathianni) khian Government Kolasib College-a Counting Hall pathumah chhiar a ni dawn a ni.