2780/2023-2024

Aizawl the 13th November, 2023 : Vawiin khan Directorate of Women & Child Development, Social Welfare, Tribal Affairs, Women & Child Development Department huaihawtin “Training of Trainers on Gender Budgeting for Government Officials” chu Aijal Club Conference Hall-ah neih a ni.

He ni khat awh Training hi Pu K. T. Beicho, Principal Secretary, Social Welfare, Tribal Affairs, Women & Child Development Department chuan hmanpuiin kalkhawmte lawmna thu a sawi a. Midangte zirtirna pe chhawng leh theitu tur thlan bik Department leh Training Institute-te an nih angin Gender Budgeting pawimawhna midangte hrilh hre tura theihtawp chhuah turin a fuih a, Sustainable Development Goals (SDG) 17 zinga 5-na kha intluktlanna chungchang (Gender Equality) a ni a, SDG-in a hmachhawpte zingah kum 2030-ah chuan hnufual bik awm lova intluktlanna neih theihna tura hmalak a ni a. Hmeichhia leh mipate intluk tlan theihlohna awmte hnawh khah a nih a, a inchen lote inchen tir a lo nih theihna turin Gender Budgeting hi a tangkai hle a ni a ti bawk.

Sawrkar Department tin ten an ngaihthah theih loh tur leh ral bang bik awm thei lo tura an ṭan tlan a ngaihna chu Gender Budgeting hi a ni a, Gender Budgeting atana hma la tur Nodal Department chu Women & Child Development niin, Mizoram State puma atana Gender Budgeting atana Nodal Officer turin Women & Child Development Director pawh sawrkar pawmpuina-in ruat a ni tawh a. Tunah hian Department tina Gender Budget Cell din a nih theihna turin chak takin hma lak mek a nih thu sawiin, ramin hma a sawn theihna tur chuan a hmei a pa, naupang atanga puitling thlengin tlabal bik lai awm lova an mamawhna zawn theuha tih chak an ngai a, chumi tichak tur chuan Gender Budgeting hi a pawimawh em em a ni a ti bawk.

He Training pawimawh takah hian UN-WOMEN lam mi thiam Dr. Sanghamitra Dhar, Programme Lead, Gender Responsive Budgeting  chu sawm niin a ni hian  thiam takin zirtirna a rawn pe a ni.