Vawiin khan Kolasib Taitesena Hall-ah ni thum awh tur District Level PMEGP Exhibition chu Pu K. Lianzuala, Chairman, Mizoram KVI Board chuan a hawng.

Hawnna thu sawiin Pu K. Lianzuala chuan, PMEGP hi Central sawrkar flagship programme a nih avangin a pawimawh em em a. Miin mahni kutkawiha ama thiamna leh theihna hmanga ram leilung hausakna te hmang chunga ama puala eizawnna ngelnghet a neih theihna hmanraw pawimawh tak a ni, a ti a. PMEGP hnuaia KVI Board ten mite thiamna leh tuina haichhuaka training leh tanpuina chi hrang hrang a kalpui thinte hi mipui ten i chhawr tangkai ang u, a ti. KVIC leh KVIB te hian thingtlang mite tan Loan an lakin 35% Margin money a tihsak thin a. Khawpui (rural) mite tan 25 % a tihsak bawk thin a ni, Pu Lianzuala chuan a ti a, Zemabawk –ah KVI chuan Multi Purpose Training Centre a bun a, hetah hian eizawnna tling Discipline 11 –ah training a pe thin a. Tunlai khawvel lehkhathiam leh thiam lo pawh hna nei lo, (unemployed) kan pun chhoh zelna hunah hian sawrkar hna leh sawrkar puihna ringawt ngaihtuah lova, mahni thiamna leh chemkalna, heng Training Centre hmanga zawng chhuak tur hian tan la ila. Kan Economic dinhmun ti tha turin tan i la ang u, a ti a ni.

Pu Lianzuala chuan hmar chhak ram thenkhatah awhna leh itsikna ten a hrin chhuah avangin helna a nasa hle a, hetiang dinhmuna kan luh ve loh nan tan kan lak nasat a ngai ta a ni, a ti bawk a ni.

Pu Lalfela Sailo, Addl. DC, Kolasib chuan he hun hi Guest of Honour niin a hmanpui bawk a. KVIC te hmalakna chu thalai leh eizawnna neilo ten tangkai taka chhawr a duh thu a sawi. Pu Tinkhandala, Chief Executive Officer, Mizoram KVI Board chuan inkhawm hi a kaihruai a ni.

Exhibition-ah hian Stall 12 awmin thiam thil chi hrang hrang pho chhuah a ni a. Mizo Puan leh kawr, thiam hnang chei mawi, Bag industry leh ei siam thil te zawrh chhuah a ni.