India Hmarchhak state a infiammi te inelna, Ministry of Development of North Eastern Region (DoNER) in a buatsaih, 5th Dr. T. Ao Memorial North East Football Championship chu vawiin khan Aizawl Sipai Lammualah Khuallian Minister Pu H. Rohluna chuan a hawng. He Football Championship hawnna inkhawmah hian Minister leh MFA President ni bawk Pu Lal Thanzara, Parliamentary Secretary Pu Joseph Lalhimpuia, leh MLA Pu Chalrosanga Ralte te an tel bawk a ni.

Minister Pu H. Rohluna chuan India hmarchhak huap inkhel pawimawh thleng tura Mizoram thlan a nih chu lawmawm a tih thu sawiin, State chhung leh pawn atanga inkhel tur a kalkhawm zawng zawng chungah duhsakna a hlan a. Sorkar hmalakna vanga infiamna hmunhma tha zawk Mizoramin a neih chhoh zel chu a rah tunah hian kan hmu zel a ni a ti a. Mizoramin football leh infiamna chi hrang hrangah ram pum huap mai nilo, Asia leh khawvel huapah pawh hming chher thei khawpa hma kan sawn zel a beisei thu Minister hian a sawi bawk.

Vawiina Dr. T. Ao Memorial North East Football Championship neihah hian Sports & Youth Services Secretary Pu R. Lalvena chuan kalkhawmte lawmna thu sawiin, inelna thianghlim leh state hrang hrang kara inunauna siamtu a nih a beisei thu a tarlang a ni. Vawiin hian Mizoram leh Tripura team-te an intum hmasa ber a. Championship-ah hian Arunachal Pradesh tih loh chu India Hmarchhak state te an tel vek a ni.