1997/2023-2024

2023 Mimkut thla ni 25: Vawiin khan Kolasib District Level Task Force on Ruihhlo Do chu an Chairman, District Bawrhsap Pu John LT Sanga hovin DC Conference Hall-ah an ṭhu khawm a. Kolasib District chhunga ruihhlo do kawnga hma lak chhunzawm zel dan tur an sawi ho.

Chairman Pu John LT Sanga chuan ruihhlo chu ṭhalaite suattu leh chhungkaw tam tak tibuaitu, ram leh hnam hmelma a nih avangin theih tawpa do a ṭul a; Excise, Police, YMA leh kohhran te'n ruihhlo do kawngah ṭan la reng mah se, ruihhlo ngaite'n kan tha thlah hun an lo chan ve reng avangin hma lakna awm tawh sa belhchhaha hma lakna dang kalpui zel a ṭul a; tha thlah a thiang lo a ni, a ti a. Ram inthlanpui avangin thil tam tak lo chawlh lawk rih theih awm mah se, ruihhlo do erawh chawlh a thiang ve lo, a ti a. Ruihhlo do kawngah tha thawh tam leh thawk hah zual awm mah se, an kuta papek mai a rem lo va, ruihhlo hluar zel tur venna kawngah te, a ti mekte chhan chhuahna kawngah leh a la ti lote venhimna kawngah mi tin ṭan rual a ngai a ni, a ti.

He hunah hian Kolasib District aṭanga State Level Master Trainer atana ruat mi pali te hnen aṭangin August ni 30, 2023-a Aizawla "Master Trainers Training on Ruihhlo Do" an neih report ngaihthlak a ni a. Ram pumah ruihhlo leh a kaihhnawih chungchanga zirtirna inang tlang a awm a, rualkhai taka zirtirna pek a nih theih nan training hi buatsaih a nih thu te, Master Trainer-te hian mahni District huam chhunga zirna in (school & college) leh kohhran inkhawm hrang hrang (sunday school, naupang & tleirawl inkhawm, ṭhalai inkhawm, etc.)-ah te ruihhlo ṭhat lohzia an zirtir tur thu leh March 2024 hmaa District chhunga kohhran leh khawtlang 60% tal tuam hman tura beisei an nih thu te ngaihthlak a ni.

He hunah hian Kolasib Additional Deputy Commissioner Pi Melody Ngurthantluangi hnen aṭangin September ni 21, 2023-a St John's HSS, Kolasib-a "Ruihhlo Do Campaign" buatsaih report ngaihthlak a ni a. Assistant Commissioner of Excise & Narcotics Pu VL Muana Rokhum hnen aṭangin kum 2023 January thla aṭanga September ni 15 thlenga an hma lakna report ngaihthlak a ni bawk.

He hunah hian member kal khawmte'n ruihhlo ṭhat lohzia inzirtirna kalpui dan tur sawi hovin, hma lakna chak zawk a awm theih nan District Level Master Trainer tur inruat belh ni se, tih a ni a. District chhunga sikul hrang hrangah leh kohhran hrang hrangah routine siamin zirtirna hi kalpui ni se tih niin, Nodal Officer Pu Gilbert Lalhlimpuia leh SLMT-te'n ruahmanna lo siam se, tih a ni a. He'ng inzirtirnaah hian ruihhlo laka inthiar fihlim tura intiam theite tan intiamna hming an ziah hnanna tur (signature board) buatsaih ni se, tih a ni bawk.