4940/2025-2026 

Kolasib, the 20th March, 2026: Vawiin khan Deputy Commissioner Conference Hall, Kolasib-ah District Level Workshop on Handholding Scheme buatsaih a ni a. He hun hi Pu H. Lalramliana, SDO (S) chuan kaihruaiin, Pu Lalfamkima, Deputy Speaker chuan a hmanpui a ni.

Pu Lalfamkima, Deputy Speaker chuan thu sawiin, Kolasib Bawrhsap Pu Robert C. Lalhmangaiha hun lo taka a boral thut chu pawi a tih thu leh a thawng hle tih a sawi a. Mi tha tak, pa inngaitlawm leh mi kawm thiam tak a nih thu sawiin a ui takzet a ni, a ti.

Handholding Scheme chungchang sawi chhunzawmin, Bana kaih policy chu sawrkar policy pawimawh tak a ni tiin, scheme thar leh tha tak a nih avangin mipuite hnenah inzirtirna (awareness) neih tam a pawimawh thu leh he scheme in a tum berte mipuite'n an hriatthiam a tul hle a ni, a ti. Sawrkarin he scheme hi uluk takin a kalpui thu leh, a ti tak tak turte kaichhuak a, leirem an rah theih ngei nana duan a nih thu a tarlang a. A dawngtute pawhin ti hlawhtling ngei tur leh tangkai taka hmang turin a chah a ni.

He hun kaihruaitu Pu H. Lalramliana, SDO (S) pawhin tunhnaia thli leh rial avanga Kolasib district huamchhung khaw hrang hranga chhiatna thleng chungchang a tarlan bakah Kolasib District pa ber, Bawrhsap Pu Robert C. Lalhmangaiha'n a boralsan thut chu a thawng hle tih a sawi a. Pa fel leh taima, mi kawm nuam leh hna ngaipawimawh mi a nih thu sawiin, sawrkar office hrang hrang te pawhin an ui takzet thu a tarlang a ni. SDO (S) chuan mi harsa zawkten leirem an rah theih nana duan Handholding Scheme chu a dawngtuten hlawhtlingpui ngei turin duhsakna a hlan a. Sawrkar line department-te pawhin beneficiaries ten an scheme thlan te an hlawhtlinpui theih nan an theihna zawn theuhah puibawm turin a chah bawk.

Hun tiam chhungin technical session hman chhunzawm a ni a. Pu Neng Thianlala, Deputy CEO (Handholding) chuan Handholding chungchanga thil pawimawh hrang hrang sawifiahna hun hmangin zawhna leh chhanna hun a kaihruai a. Pu H. Lallianzuala, Member, MSPCC chuan Handholding Scheme chungchanga hriattur pawimawh sawifiahna leh inzirtirna hun a hmang bawk a ni. Pu JD Traite, ADM, NABARD Manager chuan KCC Scheme hnuaia loan chungchanga hriattur pawimawhte tarlangin, Pu Lalduhsaka, Asst. LDM, Kolasib hnen atangin Handholding Scheme hrang hranga loan pekchhuah tawh dan report ngaihthlak a ni bawk.

He hunah hian I&PR Office, Kolasib-in district huamchhunga Handholding Scheme success story video an buatsaih chu thlirho a ni a. Zawhna leh chhanna hun hman a nih hnuah Pi Lalrinchhani, SDC, Kolasib chuan lawmthu sawiin hun a khar a ni.

Vawiin hunah hian chanvo neite kan tarlan bakah khian Pu Samuel Sailo, BDO, Bilkhawthlir leh Dr. Dorris Lalrinawmi, BDO, Thingdawl te, line department official te, Joint VC Kolasib aiawhte leh Handholding Scheme beneficiaries te an tel a ni.