4939/2025-2026
Dated Serchhip, the 20th March, 2026: Vawiin khan District Hospital Serchhip chuan NQAS leh LaQshya Certification lawmna hun Zotawna Park Serchhip ah an hmang a, Serchhip DC Pu Paul L. Khuma chuan khuallian niin a hmanpui.

Khuallian chuan District Hospital Serchhipa thawktuten district an tihmingtha hle mai a, tehna hrang hrangah mark sang tak an hmu vek thei chu chhuanawm a tih thu a sawi a. Damdawi ina thawktuten damdawi chauh nilovin kan tawngka chhuakin mi a tidam thei a ni tih hi kan hriat reng a tha a, damlo an lo kal a, kan lo biak danin nasa takin thu a sawi dawn a ni, tiin, mi zawng zawng an inang vek lova, thawktute tawngkam an dawnsawn dan pawh a inang vek thei lo a ni tih kan vawn reng a, an tawngka chhuak chu mi tan damna a nih rualin mi natna belhchhahtu a ni thei a ni tih vawng reng turin a chah a ni.

Kan hnathawhnaah hian thil inthlakthleng a awm zel a, thil thar a awm ang zelin thawktute pawh inzir thar zel turin a chah a. Hmasawnna nei tura mi tinin tan lak a tul thu a sawi bawk. Kan district-a damlo min enkawl saktu chungah lawmthu a sawi a, Serchhip District Hospital leh a thawktute lo vul zel turin duhsakna a hlan a ni.

Dy CMO Dr. Lallawmkimi chuan kan tum tak taka, rilru kan pek chuan a theih a ni tih hi a lang chiang a. Certification kan dawn theihna hi kan zaa kan thawh hona a ni tih hi a chiang a ni, a ti a. Kan thawh chhan chu mipuite anni a, a hmasa berah kan dah reng tur a ni. Certified kan nih tawh avanga chawl thei kan ni lova, hmalam pan zel tur kan ni, tiin a sawi a ni.

Dr. Beth VL Nuntluangi, District Hospital Quality Manager chuan technical report a pe a, January ni 25, 2022 khan Internal Performance Agreement hi Serchhip District Hospital hian a lo ziah tawh thu a sawi a. Damdawi in building hmasa thiah a nih tak avangin hmalak chak theih a nih loh rualin thawktute inpekna azarah ni 25 June, 2025 khan State Certification an hmuh thu a sawi bawk. Hemi hnu hian nasa lehzuala hma lain December 2026 khan National Quality Assurance Standard (NQAS) leh LaQshya Certified Hospital a puan an lo ni ta a ni, a ti a. NQAS chu damlo enkawlna leh damdawi in inrelbawlna chungchang endikna a ni a, LaQshya chu nau neihna hmun leh zai chhuahna hmunte hnathawh dan leh damlote enkawl dan endikna a nih thu a sawi bawk a ni.

He hunah hian Dr. ZD Lalmuanawma, District Medical Superintendent chuan kalkhawmna lawmna thu a sawi a. Dr. H. Lalengzauva, Senior Chief Dental Surgeon chuan lawmthu sawiin a khara ni