4938/2025-2026

Lunglei, 2026 Vau thla ni 20: Vawiin khan Lunglei District Bawrhsap Pi Navneet Mann hovin a hna thawh pindanah Lunglei District-a tuialhthei (Petroleum, Oil & Lubricants – POL) leh eirawng bawlna gas (Liquefied Petroleum Gas – LPG) dinhmun leh harsatna a awm loh nana thil pawimawh hrang hrangte sawi ho a ni a. Lunglei District Level Committee on Joint Control Room member – DC Office, Police, DCSO leh DIPRO official-te, Lungleia filling station leh gas agency hrang hrang ai awhte an tel.

Bawrhsap Pi Navneet Mann chuan tun lai khawvel ram ṭhenkhata buaina thleng boruakah India ram hmun ṭhenkhatah mipui an chi-ai avangin ni tin mamawh inchuh buai a awm tih sawiin, mipuiin mahni mamawh bak an chhek khawl chiam chuan harsatna a thlen thei zawk tih a sawi a. Sawrkar laipui, Mizoram sawrkar leh Lunglei District thuneitute pawhin ni tin mamawha harsatna a thlen loh nan theih tawp an chhuah tih sawiin, tun dinhmunah ni tin mamawh nghei hlauhthawnawm eng mah a awm lo tih a sawi a. District mipuite chu chi-ai lo tur leh mahni mamawh bak chhek khawl tum lo tura chahin, sumdawngte pawh thil chheprelh a awm loh nana fimkhur tur leh thil man tihtona remchanga hmang lo turin a chah.

He hunah hian Lunglei District chhunga ni tin mamawh hmuh kawnga harsatna a awm loh nan DC Office aṭangin March ni 16, 2026-ah Joint Control Room din a nih thu te, District Emergency Operation Centre (DEOC) chu Joint Control Room atan ruat a nih thu te, mipui chi-ai lo tur leh inrenchem tura inzirtirna theh darh a nih thu te, Supply Directorate leh DCSO pawhin mipui hriattirna an chhuah thu te tar lan a ni a. POL Filling Station leh Gas Agency ai awhte chuan tun dinhmunah POL leh LPG chhek khawl sa an nei ṭha tih sawiin, bungraw phur lirthei pawh a pangngaiin an tlan reng tih an sawi a. Tun dinhmunah POL leh LPG inchuh buai a awm loh thu te, buaina a awm a hlauhthawnawm loh thu te sawiin, eng kim tluang tak leh felfai takin a kal zel theih an beisei thu an sawi.

He ṭhut khawmah hian Joint Control Room member-te leh POL leh LPG zuarte inbiak pawh zung zung theih nan WhatsApp group siam ni se, filling station leh gas agency te'n an chhek in dinhmun ni tin report theh lut se tih a ni a. SDC, Police, DCSO, Legal Metrology, DDMA leh Agriculture lam ai awhte telna Flying Squad din niin, anni hian ni tin mamawh chheprelh, hralh ruk leh a man tihto a awm leh awm loh an endik ṭhin dawn a. Mipui mamawh hnianghnara a awm theih nan leh zirna hostel te'n harsatna an tawh loh nan te, hemi kaihhnawiha thuthang dik lo theh darh leh mipui chi-aina a thlen loh nan te a ṭul anga hma lak ni se tih a ni bawk.

Lunglei District-a POL leh LPG hnianghnar dan dinhmun te, a kaihhnawih harsatna hrang hrang te vil turin Joint Control Room siam niin, POL, LPG leh ni tin mamawh bungruate chheprelh, a mantova zuar leh mipui tichi-ai thei zawnga thu dik lo theh darh an awm chuan dan angin an chungah hma lak a ni dawn a. Hemi kaihhnawiha harsatna leh mamawh thlen duh nei chuan phone number 9862653478-ah hian Lunglei DEOC chu biak pawh theih reng a ni.