3393/2023-2024
2024 Pawlkut thla ni 18:  Vawiin chawhnu khan Kolasib District Sports Committee chu an Chairman, District Deputy Commissioner Pu John LT Sanga hovin DC Conference Hall-ah an ṭhu khawm.


Chairman Pu John LT Sanga chuan infiamna chuan taksa leh rilru hriselna a keng tel tih sawiin, infiamnaah ṭhalaite kan hruai luh theih chuan a hranpain ruihtheihthil do lo mah i la, nasa takin ruihhlo dona kawngah min pui dawn a ni, a ti a. Ṭhalaite tana hriselna leh eizawnna ni thei turin District chhungah infiamna chi hrang hrang nasa lehzuala chawi lar leh kalpui a pawimawh thu te, ṭhalaite cho phur turin discipline hrang hrangte activity pho lan thiam a pawimawh thu te sawiin, discipline hrang hrangte inlungrual leh inhre pawh tlang taka ke pen turin a chah a. Sawrkarin District Sports Committee a din kal tlangin Kolasib District-in infiamna lamah hmasawnna duhawm zawk a neih theih a beisei thu a sawi.


Vawiin ṭhut khawmah hian Kolasib Sr Superintendent of Police Pu Lalrinawma Traite, Kolasib District Sports & Youth Officer Pu C. Lalrinsanga leh sports discipline hrang hrang hruaitute an kal khawm a. Mizoram State Sports Council (MSSC) aṭanga promotional fund sanction dawn chu discipline 18 tan ṭhen sawm a ni a. Discipline hrang hrang 17 hnen aṭangin an hma lakna leh hlawhtlinna (achievement) ngaihthlak a ni a. Discipline hrang hrangte hma lakna leh hmachhawp leh harsatnate sawi ho a nih bakah, MSSC-a thu thlen tur awmte sawi ho a ni bawk.

Attachment

  • Loading attachment...