3391/2023-2024

Aizawl, the 18th January, 2024: New Delhi-a cham mek Power & Electricity Department, Commerce & Industries leh Printing & Stationery Department changtu Minister Pu F. Rodingliana chuan Mizoram mamawhte thlenin Sawrkar laipui leh pawl hrang hranga thuneitu sangte dawrin hun a hmang mek.

Commerce & Industries Minister Pu F. Rodingliana chuan January ni 16, 2024 khan Dr. Arun Kumar Sarma, Director General, North East Centre for Technology Application & Reach (NECTAR) chu hmuin Mizoram thlai tharte lei leh hralh dan tur a sawipui a. Dr. Arun Kumar Sarma chuan Mizoram kuthnathawktute tharchhuah Sawhthing, Hmarcha leh Aieng te chu India ram chhung leh pawna hralhpui a inhuam thu lo hrilhin, a tam lamah harsatna a awm a rin loh thu a lo hrilh a ni.

P&E Minister Pu F. Rodingliana chuan Pu Vivek Kumar Dewangan IAS, Chairman & Managing Director, REC Limited pawh rei tak kawmin Mizoram tana tul leh pawimawhte a sawipui a. Minister chuan State dang nen inanga khai rual theih kan nih loh thu sawiin, "Zalenna sual avangin kum 20 zet rambuai niin hmasawnna kal mumal thei lovin a thuanawp a, tunah chuan India rama state ralmuang berte zinga mi kan ni leh tawh a, chuti chung chuan sum leh paiah kan la harsa em em a, sawrkar hnathawkte hlawh pawh pe thei tawk tawk dinhmunah kan ding mek a ni" tiin, State dangte aia tehfung thlah dul deuh turin a ngen a. Pu F. Rodingliana ngenna ngai pawimawhin 10% Utilization Certificate chauh pawh Department-in rawn thehlut se, Revamped Distribution Sector Scheme (RDSS) bikah chuan second instalment a lo release tur thu Chairman & Managing Director REC Ltd. chuan a sawi a ni.

Hei bakah hian P&E Minister chuan Modernization, Smart Metering leh Loss Reduction atana P&E Department-in DPR cheng vaibelchhe 806 hu an thehluh chu a taka tihlawhtlin a tulzia hrilhfiahin, Mizoramin power za zela 33 (33%) chuang Transformation loss kan neih thu leh Transfomer tam zawk za zela 72 (72%) lai chu kum 20 chuang a upa an nih tawh avangin a tihchangtlunna tur DPR an thehluh chu pawmsak ngei turin a ngen a. Mizoramin harsatna kan tawh thinte hrilhfiahin, "Mizoramah chuan kum khatah ni 130 chuang ruah a sur a, kan kawng dinhmunte avangin thil phurh man a toin hna thawh hun chhung a tlem phah a ni", a ti a. Pu Vivek Kumar Dewangan IAS, Chairman & Managing Director, REC Limited chuan MP inthlan zawhah Minister thu thlente tihhlawhtlin ngei a tum thu a lo hrilh a. Un-Electrified village/inhabitants (eng la luh lohna khua) a eng lakluhna tur DPR cheng vaibelchhe 144 hu thehluh tawh pawh pek ngei a tum thu a sawi bawk. Meeting-ah hian Pu Arun Kumar Tyagi, Executive Director, REC leh Director dang engemaw zat an tel a ni.

January ni 16, 2024 vek khan Commerce & Industries Minister chuan Pu Rajesh Agrawal, IAS leh Pu Amardeep Singh Bhatia, IAS, Additional Secretary, Department of Commerce & Industry, Government of India-te pawh kawm nghalin Indo-Bangladesh Border Trade leh Mizoram Sawrkar Policy chungchangte a sawipui a. Mizorama Thingpui huan siam leh tihhmasawn kawnga hmalak dan turte sawi puiin, a zirchiang tur leh hmalakho dan turte a rang lama enho a nih theih nana Mizorama Official leh mithiamte tirh an nih theih dan turte sawiho a ni bawk.

Pu F. Rodingliana hi Pu P.K. Singh IAS, CEO, Government e Marketplace (GeM) nen pawh khunkhan taka in dawrin, Mizorama Enterprise-te leh thalai entrepreneur-te chawikan dan tur a sawi pui a, Pu P.K. Singh chuan Mizoram thil siam chhuahte khawvel hmun dang thlengpha tura zau zawka hralhpui a tum thu a lo hrilh a ni.

Minister Pu F. Rodingliana chuan Small Industries Development Bank of India (SIDBI) Chairman aiawh Pu Sunbransu Acharya, Chief General Manager pawh kawmin, Handholding Policy atan cheng vaibelchhe 200 pek dan tur an sawi dun a. SIDBI Chief General Manager chuan Mizoram Sawrkar Finance Department-in a remtih phawt chuan a pung tlemte awma puk tir dan tur lo ngaihtuah an tum thu Minister hi a hrilh a ni.

Pu F. Rodingliana chuan Sawrkar laipui hnuaia Official te'n Mizoram Sawrkar thar an lawmpui thu leh beiseina thar nena thawhho zel an inhuam thu an lo hrilh zel chu lawmawm a ti a. Hun reilote chhunga mi pawimawh tak takte a hmu leh State tana tul leh tangkai turte inpawhtlang taka sawiho a ni chu lawmawm a tih thu sawiin, hmalaknate a hlawhtlin theih nana theihtawp chhuaha tanrual zel a tul dawn thu a sawi bawk.