3391/2023-2024

2024 Pawlkut thla ni 18: Vawiin khan Kolasib DC Conference Hall-ah District Deputy Commissioner (Bawrhsap) Pu John LT Sanga hovin India ram puma tualchhung sawrkar thuam chak tura hma lakna, Rashtriya Gram Swaraj Abhiyan (RGSA) chungchang inhrilh hriatna hun hman a ni.

Chairman Pu John LT Sanga chuan Kolasib District-ah sawrkar hma lakna tam tak kalpui a ni a, hma lakna a hlawhtlin lehzual theih nan department hrang hrangte kan hna thawh leh hma lakna inhriatpui tawn a, a theihna apiangah thawh ho zel a pawimawh a ni, a ti a. RGSA pawh Mizorama kalpuitu ber chu Local Administration Department (LAD) a nih rualin, department hrang hrangin kan hriatpui a, kan tel vena leh kan hma lak ve theihna tur kan hriat chian theih nan sensitisation meeting hi ruahman a ni, a ti a. RGSA-in a tum ber chu tualchhung sawrkar, mipui rorelna (democracy) bul ṭhut, village council (VC)-te tha tihchak a nih angin leh VC-te tel lova khawtlang hmasawnna hna thawh a kal theih loh avangin, department-te'n VC-te thawhpui thiam a pawimawh hle a ni, a ti.

He hunah hian Kolasib District chhunga sawrkar department hrang hrang hotute an kal khawm a. District Local Administration Officer Pu ST Lalhmingmawia chuan RGSA hnuaia Kolasib District chhunga hma lakna report a pe a. State Institute of Rural Development & Panchayati Raj (SIRD) Extension Training Centre (ETC), Kolasib-a Faculty (CD) Pi T. Lalchhanhimi'n "Overview of RGSA" tih thupui hmanga powerpoint presentation pein, RGSA chungchang a sawifiah a. Zawhna leh chhanna leh sawi hona hun hman a ni bawk.

RGSA hi Ministry of Panchayati Raj hnuaia centrally sponsored scheme niin, hmasawnna ngelnghet leh tlo zawk a awm theih nana tualchhung sawrkarte tihchak leh tihhmasawnna tura ruahman a ni a. Tualchhung sawrkar fawng vuantute theihna leh thiamna hai chhuah leh tihpun a nih theih nan training hrang hrang hmanga hma lak niin, mahnia ro inrel thei tur te, an khua/venga sawrkar hma lakna hrang hrang ṭangkai thei ang bera an chhawr thiam theihna tur te, mi dang puihna mamawh lova mahnia sum thawk chhuak thei tur tea zirtirna leh puihna pek an nih bakah, hna thawk ṭhate tan lawmman te pawh siam ṭhin a ni.

Mizoramah chuan RGSA hnuaia hma lakna hi LAD-in keng kawhin, tualchhung sawrkar VC-te tan hma lakna hrang hrang kalpui a ni a. Kum 2023 December ni 11 thleng khan RGSA kal tlangin Mizoram pumah Panchayat Bhawan (VC House) thar 150 sak niin, 93 chei ṭhat a ni a. Common Service Centre (CSC) 15 din niin, VC hrang hrang hnenah computer set 243 sem a ni bawk a. RGSA hnuaia Economic Development & Income Enhancement Project kal tlangin hna lian tak pathum - Arecanut Leaf Plate Production Centre, Bilkhawthlir (₹ nuai 49 project); Rural Homestay & Agro-Tourism Project, Tuipui D (₹ nuai 84 project) leh Handloom Design Training cum Production Centre, Thenzawl (₹ nuai 141.23 project) te thawh zawh tawh a ni a. Hnahthial, Khawzawl leh Saitual-ah te District Panchayat Resource Centre (DPRC) sak hna kalpui mek a ni bawk.

Kolasib District chhung bikah RGSA hnuaia hma laknaah Panchayat Bhawan sak thar 22 leh chei ṭhat 14 awmin, VC 10 chuang hnenah computer set pek a ni a; Pangbalkawn, Bairabi North leh Saiphaiah te CSC din a ni bawk. India ram puma tualchhung sawrkar ṭha lawmman National Panchayat Award sem ṭhinah kum 2021 khan Kolasib Venglai Village Council chuan Gram Panchayat Development Plan Award (GPDPA) dawngin, he Award hian pawisa fai ₹ nuai 5 a keng tel a ni.