2974/2023-2024

2023 Pawltlak thla ni 8: Vawiin khan Kolasib District Task Force on Immunisation (DTFI) leh Kolasib District TB (Tuberculosis) Forum chu an Chairman, Kolasib District Bawrhsap Pu John LT Sanga hovin Kolasib DC Conference Hall-ah an ṭhu khawm.

Chairman Pu John LT Sanga chuan hriselna ngaih pawimawh a ṭul thu sawiin, tlang hrileng leh natna tam tak chu fimkhur loh vanga mi dang kai chhawn theih a ni, a ti a. Hriselna ṭha nei turin inenkawl uluk a, mahni hriselna dinhmun enfiah ṭhin a pawimawh tiin, hriselna leh dam reina chu Pathian malsawmna a nih rualin, eng emaw chin chu kan kutah a awm a, mahni inthununna aṭangin hriselna tihṭhat theih a ni, a ti a. Kolasib District-a hriselna kawnga thawktute'n theih tawp an chhuahnain rah ṭha a chhuah theih nan District mipuite thawhpuina a pawimawh thu sawiin, hri danna lak chungchangah pawh naupang, raipuar leh hri danna la turte'n a hun taka an lak theih nan chhungkuaa nu leh pate ṭan rual a pawimawh a ni, a ti.

He hunah hian health department-a thawktute, education, women & child development, LAD, RD leh I&PR department ai awhte, NGO leh MJA ai awhte leh TB champion te an tel a. DTFI Secretary, Kolasib District Senior Chief Medical Officer Dr RK Lalthlamuana chuan DTFI hma lakna hrang hrang report pein, District TB Officer, Deputy CMO ni bawk Dr Zonunsiama'n District TB Forum hnuaia hma lakna report a pe thung a. Kum kal meka Task Force leh Forum hnuaia hma laknate thlir ho niin, hmachhawp awmte leh hmasawnna tura rawtna hrang hrangte sawi ho a ni bawk.

He hunah hian hri danna (vaccine) hmanga ven theih natna hrang hrang vanga thi an awm tawh loh nana ngawrh lehzuala hma lakna Intensified Mission Indradhanush 5.0 hnuaia hma lakna report pek niin, kumin August leh November inkar (thla 4) chhungin Kolasib District chhunga Sub-Centre 4 hnuaia hmun 9-ah naupang kum 5 hnuai lam leh nu nau paite hnenah hri danna pek beihpui thlak a nih thu tar lan a ni a. Naupang kum 1 hnuai lam target 318-ah 285 hri danna pek niin, kum 1 - 2 inkar target 151-ah 85 leh kum 2 - 5 inkar target 120-ah 54 hri danna pek an ni a. Raipuar hri danna pek tur target 94 neih a nih laiin, raipuar 119 chu hri danna hi pek an ni.

Kumin (2023) December thla ral hmaa sentut (measles) leh sentutfang/ni-thum sentut (rubella) natna um bo tura beihpui thlak mekah kumin April - October inkar (thla 7) chhungin nausen thla 9 leh thla 12 inkar MR (measles-rubella) vaccine pek tur target 854 aṭangin 820 (96.02%) chu MR1 vaccine pek niin, naupang thla 16 leh kum 5 inkar MR vaccine pek tur target 854-ah 748 (87.59%) chu MR2 vaccine pek an ni thung a. MR um bo tur hian MR1 leh MR2-ah 95% ve ve phak ngaiin, District chhungah MR hrileng (block 1-a MR vanga damlo 5 awmna chin) leh MR vanga thihna a thlen loh a ṭul a. Kolasib District chhungah MR hrileng leh MR vanga thihna hi la thleng lovin, vaccine target 95% pawh hi khum theih ngei beisei a ni a. District chhunga Anganwadi Centre hrang hrangah MR vaccine pek hi ngawrh taka kalpui mek a ni.

Kolasib District chhungah naupang kum 10 leh tleirawl kum 16 te tan sakawr-ek-hrik (tetanus) leh hrawk na (diphtheria) hri danna, Td vaccine pek kalpui mek ni bawkin, April - October, 2023 chhung hian Td10 1,065 (56%) leh Td16 899 (45%) pek a ni tawh a. Hri danna kalpui sa pangngai (Routine Immunisation) kalpui dan hi uluk taka vil (monitor) reng niin, target tlin turin beihpui thlak reng a ni a. Weekly Surveillance kal tlangin measles-rubella, polio leh diphtheria hrileng a awm leh awm loh thlithlai reng niin, hri kai nia rinhlelhte chu rang taka enfiaha vil zui zel an ni a. Tun dinhmunah Kolasib District chhungah hri danna hmanga ven theih natna vei hriat chhuah leh nem ngheh (confirmed case) a awm rih lo a ni.

April - December, 2023 inkar chhungin Kolasib District-ah ngawr (TB) vei rinhlelh khak (sputum) endik 1,492 aṭangin TB vei nem ngheh 144 an awm a. Mi 62 chu enkawl dam tawh niin, enkawl lai 82 an awm a. TB leh HIV vei kawp 14 awmin, TB vei enkawl laia thi 3 an awm bawk.

District TB official-te chuan TB hrik en leh damlo enkawlna chu sawrkarah a thlawn vek a nih bakah, Nikshay Poshan Yojna (NPY) hnuaiah damdawi ei chhung zawng thla tin ₹ 500/- pek an nih thu leh inenkawl zawh hnuah ₹ 750/- pek ṭhin an nih thu sawiin, TB chu enkawl hma a, ṭha taka damdawi ei chuan a dam hmain, harsatna nasa zawk a pumpelh theih tih an sawi a. Hei bakah hian TB veite'n an inenkawl chhunga chaw ṭha an dawn theih nan mi inphal (Nikshay Mitra)-te hnen aṭangin ṭanpuina sum dawn ṭhin a ni bawk a. Tun dinhmunah Kolasib District chhungah Nikshay Mitra (donor) 35 awm mekin, damlo 35 ṭanpui mek an ni a. Nikshay Mitra tur hian thla tin ₹ 700/- hisapa ṭanpuina pek theih niin, District TB Forum chuan TB veite tan mi inphalte pen chhuak zel turin a ngen a. Heti anga inphal, ṭanpuina pe theite chu Kolasib District (PPM) Coordinator Pu Lalmalsawma Fanai (Ph: 8414009192) hnenah inhriattir theih a ni.

He hunah hian Central TB Division aṭanga Kolasib District-in X-Ray khawl a dawn chu District Hospital Kolasib-ah bun a nih thu leh October 18, 2023 aṭang khan hman ṭan a nih thu ngaihthlak a ni a. August 19, 2023 khan GME Engineer-te'n a X-Ray machine rawn bun (install)-in, a thlalak her chhuahna CR system chu October 17, 2023 khan Carestream lamin an rawn vuah (install) bawk a ni.

He hunah hian nakkum (2024) World TB Day, March ni 24-a TB awm lohna khua (TB Free Village) lawmman sem tur atan Kolasib District chhunga khaw tam thei ang ber TB Free Village-a puan a nih theih nana hma lakna kalpui mek chungchang sawi ho a ni bawk a. TB Free Village ni tur hian kum khat (January - December) chhungin khaw khata mihring cheng zat azirin mi 1,000 zelah mi 30 tal endik tur niin, mi 1,000 zelah TB vei nem ngheh mi 1 aia tam an ni tur a ni lo va; TB vei enkawl hlawhtlin 85% aia sang tur niin, TB veite chuan NPY leh Nikshay Mitra ṭanpuina an dawn ngei a ṭul bawk a. He'ng tehna hrang hrang aṭang hian tun dinhmunah Kolasib District chhungah TB Free Village ni thei tur khaw 15 a la awm a ni.