2334/2023-2024

2023 Khuangchawi thla ni 16: Vawiin khan Mizoram Legislative Assembly Inthlanpui, 2023 lo awm tura Kolasib District chhunga assembly bial pathum - 4-Tuirial (ST), 5-Kolasib (ST) leh 6-Serlui (ST) atana Election Expenditure Observer atana ruat Pu Karni Dan, IRS hovin Expenditure Monitoring Team hnuaia team hrang hrangte chu Kolasib DC Conference Hall-ah an thu khawm a. Felfai zawka political party leh candidate-te sum hman dan endik leh chhinchhiah dan tur an sawi ho.

Expenditure Observer Pu Karni Dan chuan Election Commission of India-in a duh ber chu inthlanna thianghlim leh felfai tak a awm a, inthlan chuhtu zawng zawngin chanvo inang tlang changa zalen taka inthlan an chuh theih nana remchang siamsak a nih thu sawiin, chumi tipuitling tur chuan Expenditure Monitoring Team hnuaia team hrang hrangte chuan mawh an phur lian hle tih a sawi a. Duhsak bik leh thlei bik nei lova an mawhphurhnate khawng tak leh dik taka hlen chhuak turin EMT hnuaia thawkte chu a chah a ni.

Kolasib District Election Officer, Kolasib assembly bial Returning Officer ni bawk Pu John LT Sanga chuan inthlan hun a hnaih tawh avangin mahni mawhphurhna theuhte inthlahdah lova tih zung zung a ngai tih a sawi a. Model Code of Conduct hman a nih tawh avangin MCC kenkawh kawnga mawhphurtute chu magistrate an nih anga khawng taka an mawhphurhna kengkawh tura chahin, duty inthlahdah vanga harsatna a thlen loh nan duty laia fimkhur tur leh nuam ti taka mahni mawhphurhna hlen chhuak turin inthlannaa mawhphurhna neite chu a chah a ni.

He hunah hian Tuirial bial RO Pi Melody Ngurthantluangi leh Serlui bial RO Pu Lalmuan Puia te pawhin thu an sawi a. Assistant Expenditure Observer (Kolasib AC) Pu Kevin Lalmalsawma'n daily report pek dan felfai zawk a awm theih nana thil pawimawhte sawiin, AEO (Tuirial AC) Pu Lalramhluna Colney chuan evidence tha leh rin tlak a awm theih nana team hrang hrangte tih tur a sawi zau va. Zawhna leh chhanna leh sawi hona hun hman a ni bawk.

He hunah hian Expenditure Observer leh RO-te bakah, ARO-te, Assistant Expenditure Observer-te leh Accounting Team-te, District Media Certification and Monitoring Committee member-te, Flying Squad Team, Static Surveillance Team, Video Surveillance Team leh Video Viewing Team member-te an kal khawm a ni.