Tukin zing dar 7:30 khan Kolasib Venglaia Mahatma Gandhi lim awmna hmunah Faina Hapta hawn a ni a. Kolasib DC Pi Niharika Rai, IAS chuan a hawng a ni.

Hawnna thu sawiin Pi Niharika Rai chuan Hmasawnna atan Faina leh thianghlimna a pawimawh em em a. A tellovin mihring a changkan theih loh a ni, a ti a. Faina leh thianghlimna hi kan thinlungah vawngtlat ila, chu chu keimahniah a lo lang chhuak dawn a ni, a ti a. Faina hian hlimna, hriselna leh chakna min pe a ni, a ti. Pu Andrew Lalhruaia, District Urban Development Officer chuan faina hapta hawnna hi a kaihruai a. Inpuahchahna chi hrang hrangte tarlangin Kolasib bakah Civil SDO thuthmun pahnih Vairengte ah leh Kawnpui ah te pawh Faina hapta hman a nih thu a sawi a. Heta tan hian sum pawh ruahman a ni, a ti a ni.

Er. F. Sanglura EE, PHE chuan faina chungchangah thu a sawi bawk a. Pu H. Bazi Rama, Prominent citizen chuan lawmthu sawiin hun a khar a ni.

Faina Hapta chhung hian office leh Zirna In zawng zawngte chu inelna hranpa siam a ni dawn lova, amaherawhchu theihtawpa in tifai tura ngen an ni a.VC leh YMA te hmalaknain veng chhung tinah hnatlangpui neiin veng fai endik a ni dawn a. Thuneitu lamin khaw chhung kawng dunga mimal bungraw dah a awm leh awm lohte, ran khuahkhirhna hman mek chungchangte an endik bawk ang.

Kan hma lawk Oct 25- 27 chhunga YMA Khawmpui lian Kolasib in a thlen dawn bawk avangin mipui , tlawmngai pawl leh Deptt. tinte faina kawngah tan an la nasa hle a ni.

Hapta hi 10th Oct- ah Shopping Centre ah khar a ni dawn a ni.