Vawiin chawhma dar 9:30 khan serchhip khawchhung hmun hrang hrangah India hnampa Mahatma Gandhi piancham denchhen a neih thin Faina hapta (Cleanliness Week) 2nd October – 11th October, 2011 hawnna neih a ni .

Serchhip Sub-Headquarters YMA huaihawtin Serchhip khawchhunga V/C Area tinah area VCP theuhin faina hapta hawnna hi an nei a, vawiin hi V/C Area tina zirna school awm zawng zawngte tan “Hnatlangpui Ni” a puan anih angin zirtirtute leh zirlaiten Serchhip khawchhung hmun hrang hrang thenfai hnatlang an nei nghal a ni.

Vawiina zirlai leh zirtirtu hnatlangte hi eitur (refreshment) tuhnai tak siam sak an ni a, hnatlangte bun tur kutkawr (glove) pawh Chief medical Officer leh Sanitation Officer ten an ruahman sak a ni.

Faina Hapta pual hian inelna chi hrang hrang – V/C Area fai ber, Sawrkar Pisa fai ber, College/Higher Secondary School/High School fai ber, Middle School fai ber, Primary School fai ber leh Hotel/Restaurant/Thingpui dawr fai ber thlanna neih tur a ni a, a endiktu turte pawh fel taka ruahman vek niin heng a ti tha zualte hi Faina Hapta kharna programme October ni 12 a neih hunah lawmman hlan an ni ang.

Hei bakah hian Faina Hapta denchhen hian tan nasa takin kawng hrang hrangah lak a ni a, Bazar Area a dawr nei zawng zawngte chu an dawrah bawlhhlawh bawm nei vek tura hriattir an nih bakah Workshop hrang hrang enkawltute pawh bawlhhlawh bawm neitura hriattir an ni a, ran khuahkhuirh chungchangah pawh khauh lehzuala hmalak a ni bawk.

Nimin October ni 2 kha Pathianni anih avangin a hawnna inkhawm hi vawiin (Thawhtanni) hian hman tura ruahmanna siam a ni.