Faina Hapta, Kolasib-ah tukin khan hawn a ni ta a. Khuallian  DC Pi Niharika Rai, IAS hovin mipui kalkhawm ten Venglai Bazar atanga DC Bangla thleng kea kalin khawlaia bawlhhlawh tlate an chhar a ni.

Mahatma Gandhi lim, Venglai Bazara zahna pangpar a dah zawhah DC hian Faina hapta 2012 hi a hawng a. Thuchah sawiin Gandhiji pianchama hapta kan hmang hi thil inhmeh tak a ni a. Hapta chhung mai ni lo, engtiklai pawha faina leh thianghlimna kan rilrua kan vawn tharna hun atan hmang ila. Kolasib khaw faina leh thianghlimna tura UD&PA deptt. in hmachhawp leh ruahmanna thar an neihte – bawlhhlawh dahkhawm leh tihral dan tehi a chhuanawm ka ti a. Mipuiin hei hi i thlawp tlat ang u, Pi Niharika Rai chuan a ti a ni.

Pu Andrew Lalhruaia, Dudo chuan Hapta hawnna inkhawm hi a kaihruai a. Pu HT Rila, President Sub Hqrs YMA Kolasib chuan thuchah sawiin faina kawnga tan la thar turin mipuite a sawm a. Bal/bawlhhlawh hian natna a thehdarh avangin kan thil eina kawr leh tawphnawk kan tihral danah fimkhur ila. Mahni in bul leh a vel zau deuh zawkte tihfai I ching ang u, a ti a ni.

Inkhawm neih zawh veleh hian khuallian hovin Deptt. Mite, NGO, MJA te leh sikul naupangten DC kawttual thleng kea kalin bawlhhlawh tlate an chhar a ni. Faina Hapta hi Kawnpui leh Vairengte ahte pawh hman a ni.