3958/2023-2024

2024 Ramtuk thla ni 26: Vawiin chawhma dar 11 khan Kolasib District Level Monitoring Committee on Farmer Producer Organisation chu an Chairman, District Bawrhsap Pu John LT Sanga kaihhruaiin Kolasib DC Conference Hall-ah an ṭhu khawm a. Central Sector Scheme for Formation and Promotion of 10,000 Farmer Producer Organisation (FPO) hnuaia hma lakna kalpui dan leh hma lak tawhnate thlir hovin, hma lak zel dan tur an sawi ho.

Chairman Pu John LT Sanga chuan FPO hma lakna chu kut hna thawktute tan a ṭangkai tak zet tih sawiin, thawktute chu theih tawp chhuaha hma la zel tur te, a hralh chhuahna kawngah pawh thawh hona ṭha tak nena hma la zel tur te'n a chah a. FPO hma lakna a hlawhtlin zel theih nan line department-te nen ṭha taka thawk ho tur leh FPO dang pawh din belh zel a nih theih nan hma la turin a fuih a ni.

Member Secetary Pu JD Traite, District Development Manager, NABARD Kolasib chuan ṭhut khawm buatsaih chhan sawi fiahin, hma lak tawhna te a tar lang a. NERAMAC hnuaia Clover Organic Pvt. Ltd leh NAFED hnuaia Kaviyasri Foundation te hma lakna report ngaihthlak a ni bawk.

NERAMAC hnuaia Clover Organic Pvt. Ltd te chuan Thingdawl RD Block leh Bilkhawthlir RD Block-ah FPO pahnih an din tawh a. Thingdawl block-ah hian Vangmawi Organic FPC Limited dinin, anni hian dragonfruit-ah hma an la a; Bilkhawthlir block lamah hian Serlui Farmer Producer Company Ltd dinin, anni hian rajmah (bean)-ah hma lakna an kalpui mek thung a ni.

NAFED hnuaiah Kaviyasri Foundation chuan Kolasib-ah Kolasib Agro NAFED Producer Company Ltd an din thu tar langin, anni hian Korean maize-ah hma an la mek thung a. He'ng pawl (FPO) pathum hian member 100 chuang ṭheuh an nei a ni.

Vawiin ṭhut khawmah hian line department hotute leh bank lam mite bakah, FPO hruaitute an tel a ni.